Сумар дня на 10. січня/януара 2024 р.

Приносиме вам сумар медияльной ґрупы ЛЕМ.фм+ на ден 10. січня/януара 2024 р.

Омбудсман занял ся справом ремісиі досліджыня Інституту Нацийональной Памяти

8. січня/януара тр. до ведучой Сторавишыня «Руска Бурса» в Ґорлицях Наталиі Малецкой-Новак вплынуло писмо од Омбудсмана Марціна Вьонцка будуче одповідю на скаргу з дня 6. грудня/децембра минулого рока в справі ганебного выступліня посла Ґжеґожа Брауна та в справі ремісиі слідства Комісиі Гоніня Злочынів проти Польскому Народови в справі рішыня о акциі «Вісла». Начальник Выділу Карного Права Пьотр Собота поінформувал в ним, што Омбудсман занял ся другом справом – усталят, ци рішыня о ремісиі досліджыня Інституту Нацийональной Памяти єст уж остаточным рішыньом та анализує поясніня той постановы. Омбудсман буде інформувал о дальшых поступах в справі. До Стоваришыня вплынули тіж одповіди од Канцеляриі Маршалка Сойму і Сенату, якы подали, што зголошыня тыкаюче ксенофобічного і шовніністичного выступліня посла Брауна взглядом лемківской меншыны, было передане до Комісиі Посольской Етикы. О поступах в справі будеме інформувати.

Вмер о. Тадеуш Ісакович-Залескій

Вчера на 67. році жытя по тяжкій хвороті вмер о. Тадеуш Ісакович-Залескій. Был католицкым духовным ормяньского і латиньского обрядів, соспільным діячом і істориком Костела. Є єдном з найбарже выразистых і єдночасно неочывидных персон Католицкого Костела в Польщы. В молодости заанґажуваный в демократичну опозицию. Рівнолегло до змагань зо Службом Безпекы і комунізмом, вынаходжыньом костельных афер, на челі в тропліньом серед духовных педофілів і справ молестуваня, заанґажувал ся в благодійну діяльніст та в поміч особам з неполносправностями, м.ін. спілосновал Фундацию Брата Альберта. Предметом його особливого заінтересуваня было досліджаня ґеноциду Ормян проведеного турецкым урядом в 1915 році та злочынів на Волыни і Східній Ґалициі. Занимал радикальне становиско в польско-украіньскых справах – м.ін. протестувал в справі плянів беатифікациі грекокатолицкого архієпархы Андрия Шептицкого – част істориків оскаржат єрарху о одкрыте попераня Гітлера і брак реакциі на злочын на Волыни. Отец помершого был безпосереднім свідком тамтых подій. Радикализм од років зближал о. Ісаковича-Залеского до скрайной і нацийоналистичной правиці. В 2006 р. президент Лех Качыньскій одзначыл го Командорскым Крестом Ордеру Одроджыня Польщы за опозицийну діяльніст.

Проблем з автом? В Польковицях поможе Містна Страж

Уряд в Польковицях припоминат, што Польковичане, котры мают проблем з урухомліньом авта, бо акумулятор одмовил спілпрацы, можут рахувати на дармову поміч містной стражы. Акция тырват протягом цілого рока, але особливо зимом, зголошынь є найвеце. Старчыт задзвонити під алярмовый номер 986 або 76 746 40 24 і зголосити проблем. Особа, котра задзвонит, мусит подати персональны даны, марку і реґістрацийный номер авта і місце паркуваня. По приізді, а перед урухомліньом авта, стражникы провірят, ци помагают властительови авта. В найблизшых днях мороз має ся зменшыти, але іщы той ночы в Польковицях температура може впасти аж і до мінус парунадцетьох градусів.

Лемковина Вінтер Трейль

Уж в будучым місяци пройдут змаганя в літаню Лемковина Вінтер Трейль. Є то зимова версия популярных змагань в літаню по верхах і убочах Лемковины. Фурт мож ся іщы записати на єдну з трьох трас долгости: 18, 33 або 55 км. Мета вшыткых трас буде находила ся в Івоничы. Старты двох долшых трас заплянуваны сут в Яслисках, а найкоротша траса то колічко зо стартом і метом в Івоничы. Записы приниманы сут іщы до 7. лютого/фебруара, о кілько скорше не будут выкуплены місця на вшыткых трасах. Партнерами змагань сут Ґміна Івонич, Ґміна Яслиска та Центр Культуры і Чытельництва в Івоничы.