Сумар дня на 10. серпня/авґуста 2023 р.

Приносиме вам сумар медияльной ґрупы ЛЕМ.фм+ на ден 10. серпня/авґуста 2023 р.

Перед нами ґожівскы Стрічы з Лемківском Культуром

По Лемківскій Ватрі на Чужыні приходит пора на дальшу подію, котру орґанізує Стоваришыня Лемків. Уж 19. серпня/авґуста в Ґожові Великопольскым одбудут ся ХХІХ Стрічы з Лемківском Культуром. Подібні як товды, коли подія одбыла ся першый раз в новій формулі, головный концерт пройде на катедральным пляци в Ґожові. Стрічы одбудут ся в рамках циклю культурных імпрез «Добрый вечер Ґожів». В проґрамі заплянуваны выступы ЛАПіТ Ластівочка з Пшемкова і ґрупы Ефір і Надія. На подію красні просят члены Кружка Стоваришыня Лемків в Ґожові Великопольскым. Припомнийме, што долгы рокы Стрічы з Лемківском Культуром одбывали ся пізном осінньом пором в ґожівскым Театрі ім. Остервы.

Вышла книжка з творчістю Александра Духновича

24. квітня/апріля тр. припоминали сме 220 років од народжыня Будителя Русинів – Александра Духновича. З той нагоды в тых днях вышол збірник його літературных творів, котрый достал назву «Александер Духнович – Моя ліра и кимбал». Книга, котру ушорил Валерий Падяк, знаный русиньскій літературознавця, обсягує поезию, прозу і драматурґію, котру написал Будитель. За выданя той новой книжкы мож дякувати головно Русинам з Мадяр. Выдавацями публикациі сут Столичне Русиньскє Нацийональне Самосправуваня в Будапешті і Вседержавне Общество Русиньской Інтеліґенциі ім. Антония Годинкы. Выданя підпорили і дальшы містны русиньскы самосправуваня на Мадярах і інчы орґанізациі, в тым з Румуніі. Книга презентує Духновича як писателя, поету, прозаіка і драматика. В рамках поезиі домінує творчіст зрілого періоду, 50. і 60. рр. XIX ст. Книга є збогачена фаховом статьом Валерия Падяка. На кінци книжкы є част з ілюстациями. В выданю найдете переклад Духновичовой пєсы пн. «Головный тарабанщык», котру зробил наш редакцийный камарат Петро Медвідь.

«Бомбель» на ждыньскій сцені

Припоминаме, што Стоваришыня ім. Мирка Нагача «Білый сокіл» та Меджепоколіньова Tеатральна Ґрупа Племя рыхтуют пару спектаклів «Бомбля», на основі оповіданя покійного Мирка Нагача з тым самым наголовком. Театральня адаптация оповіданя єст можлива завдякы дотациі Театрального Інституту ім. Збіґнєва Рашевского, котрый початком рока оголосил конкурс внесків на дофінансуваня. Спектакль вырежысерувала Моніка Бабуля – думкодавчыня і ініцияторка театральной адаптациі, разом з Мариюшом Лясковскым. Як інформуют думкодавці спектаклю, першый з премєровых показів «Бомбля» одбуде ся 27. серпня/авґуста о 20.00 год. на сцені в Ждыни при ватровиску. Што важне, спектакль презначеный єст лем для полнолітніх обзерачів.

Іконописаня в Команчы

Ґмінный Осередок Культуры в Команчы просит молодіж і дорослых взяти участ в варштатах іконописаня, котры одбудут ся в днях 16.-17. серпня/авґуста в ремізі в Комачы. Варштаты сут дармовы. Місця ограничены, зато просит ся о скоршы записы. Подія є орґанізувана в рамках проєкту пн. «Меджепоколіньовы варштаты – лучыт нас спільна культура» з проґраму Культуральна Едукация 2023. Варштаты будут зачынати ся од 15.00 год. Подію дофінансовує Міністертво Культуры і Нацийональной Спадковины.