Сумар дня на 10. серпня/авґуста 2021 р.

Приносиме вам сумар медияльной ґрупы ЛЕМ.фм+ на ден 10. серпня/авґуста 2021 р.

«Карпатскій Пут Меду» то нова атракция Бєщадского Нацийонального Парку і околиц

Пут возник в рамках унійного проєкту «Карпатска Пчола – спільны діяня для захованя унікатовой природничой спадковины на польско-украіньскым пограничы». По польскій страні туристы можут скорыстати з двох трас – роверовой, котра зачынат ся в Тарнаві Нижній, і пішой з Лютовиск до Дверника, через найдолше бєщадскє гірскє пасмо Отрит. Обі трасы были так заплянуваны, жебы переходити туристичныма атракциями ци історичныма обшырями та місцями, де мож купити або попрібувати меду. Медовым путьом мож вандрувати і по украіньскій страні. Находят ся там три стежкы, дві пішы і єдна роверова, якы зачынают ся в селах Косів і Колочава. Проєкт ма на ціли заховати місцеву красу карпатскых пчіл як части природничой спадковины та одкрыти дискусию на тему іх проблемів.

В Креници тырват 54. Фестіваль ім. Яна Кєпуры 

В суботу, 7. серпня/авґуста, в Креници зачал ся 54. Фестіваль ім. Яна Кєпуры, орґанізуваный Ґміном Крениця і Центром Культуры Крениця. Подію одкрыто концертом в Головній Пияльни і тырвала она буде аж до неділі, 15. серпня/авґуста. В часі Фестівалю презентуваны сут ріжного рода оперы, опереткы, балетовы і театральны спектаклі та концерты. Подібні як в попередніх роках, орґанізаторы задбали о богатый плян подіі, котрый задоволит і тых найстаршых, і тых дакус молодшых. На сцені в Головній Пияльни та в Старій Здройовій Хыжы запрезентуют ся так польскы, як і заграничны артисты. Окрем вечерніх концертів і спектаклів, заплянуваны сут тіж пополудньовы концерты посвячены особливо молодым артистам. Фестіваль єст найбільшом культуральном подійом, котра проходит в Креници.

«В неділю і наштоден» остатня нагода видіти выставу 

Іщы лем до 15. серпня/авґуста мож в бывшій грекокатолицкій церкви в Бортным видіти выставу пн. «В неділю і наштоден». Експозиция презентує лемківскє жіноче облечыня. На експонаты складают ся фізичны елементы бабского облечыня, як напр. кабат, запаска, ґорсет, кошеля ци кривулька. Лахы вказаны сут в особливый спосіб, не традицийні на манекінах, але поміщены, розложены сут на специяльных стояках, што спричынят, же презентуют ся як жывы образы. Експозицию дополняют великоформатовы фотоґрафіі довоєнных Лемкынь авторства Романа Райнфуса пожычены Стоваришыньом «Руска Бурса» в Ґорлицях.

Стражакы з Ліґниці і Хойнова помагают при пожарах в Грециі

7. серпня/авґуста пятьох стражаків з Державной Пожарничой Стражы в Ліґници поіхало до Грециі, жебы помочы при тырваючых там пожарах. Додатково до середморского краю выслано пожарный автомобіль з ратівничо-пожарной єдиниці но. 3 в Хойнові разом зо 4-особовом дружыном. Разом польска держава скєрувала понад 140 ратівників і 46 поіздів. Поміч направлена єст на реґіон пілострова Пельопонез, де стражакы лишат ся до 23. серпня/авґуста.