Сумар дня на 10. марця 2025 р.

Приносиме вам сумар медияльной ґрупы ЛЕМ.фм+ на ден 10. марця 2025 р.

LXXXVII засіданя Спільной Комісиі Уряду та Нацийональных і Етнічных Меншын

В середу 12 марця тр. одбуде ся 87. пленарне засіданя Спільной Комісиі Уряду та Нацийональных і Етнічных Меншын. Найблизше засіданя Комісиі буде мало особливый характер і буде ся складало з двох части: торжественной звязаной з 20. річницьом схваліня закону о нацийональных і етнічных меншынах та реґіональным языку і робочой части. На стрічы будут мати принагідны выступліня Міністер Внутрішніх Справ і Адміністрациі Томаш Сємоняк, Ведуча Комісиі Нацийональных і Етнічных Меншын Сойму Польской Республикы Ванда Новіцка, Дорадця Маршалка Сойму дс. Нацийональных і Етнічных Меншын Ришарда Ґалля і Спілведучы Спільной Комісиі Томаш Шыманьскій і Григорий Куприянович. В контексті меншынового закону буде бесіда о його ґенезі, схваліню, результатах і оціні. Піднятя буде і тема новелизациі закону. Покликана буде робоча ґрупа Спільной Комісиі Уряду та Нацийональных і Етнічных Меншын дс. зрыхтуваня проєкту новелизациі. В робочій части стрічы буде м.ін. піднята тема поділу дотаций на реализацию в 2025 р. задач маючых на ціли охорону, захованя і розвиток культуровой достоменности нацийональных і етнічных меншын та захованя і розвиток реґіонального языка.

Не выпаляй трав!

Пожарничы службы фурт апелюют о невыпаляня трав. Лем в минулу суботу пожарникы мусіли з той причыны провести понад 1000 інтервенций, ден перше більше як 700. Найвеце інтервенций однотувано в мазовєцкым, малопольскым і підкарпатскым воєвідствах. Выпаляня трав несе велику пожарову загорозу – оген скоро і в неконтролюваный спосіб може перенести ся на дальшы ґрунты, лісы ци хыжы. Єст загорозом жытя для чловека і звірят. Окрем того переписы о охороні природы і о лісах боронят выпаляти траву, а за спричыніня пожару може горозити м.ін. арешт, грошова кара або вязниця аж і до 10 років.

Петиция проти будові видоковой вежы на Святій Горі Явір

Фурт не тихнут контроверсиі коло Горы Явір, святого місця Лемків – місця реліґійного культу од докладні стох років, коли то в вересни/септембрі 1925 рока трьом молодым женам обявила ся Божа Матір. Попри выбудуваній там каплици в короткым часі зачало бити джерельце, а Гора Явір скоро стала ся місцьом, до котрого приходили і дале реґулярні приходят поломникы з цілой Польщы, аж і зо світа. Як уж сме інформували в радию і на портали, Надлісництво Лося хоче вознести видокову вежу як раз на самым вершку Св. Горы Явір, выже каплиці і будуваной церкви. До того має там быти зроблена і пленерова експозиция посвячена барскым конфедератам. Справа фурт выкликує порушыня серед лемківской соспільности, але тіж серед жытелів ґміны Устя Рускє ци туристів, котрым Низкій Бескід єст особливо близкій. Припоминаме, што на сайті petycjeonline.pl явила ся петиция противляюча ся будові видоковой вежы, авторства Любителів Горы Явір, котры апелюют до Надлісництва лишыти думку реализациі проєкту в тій локализациі. Як мож чытати в поясніню, «Плянувана інвестиция Надлісництва Лося (…) не лем перечыт характерови того місця, але тіж єст загорожыньом для його сакрум». Мотузок до петициі найдете в днешнім сумарі, або по вписаню госла «Sprzeciw wobec budowy wieży widokowej na górze Jawor».