Сумар дня на 10. листопада/новембра 2020 р.

Приносиме вам сумар медияльной ґрупы ЛЕМ.фм+ на ден 10. листопада/новембра 2020 р.

Польща в червеным списку держав Чешской Республикы

Од понеділька, 9. листопада/новембра, з Польщы не мож віхати на територию Чешской Республикы. В звязку з рекордовым чыслом зараженых на коронавіруса в Польщы чешскы власти рішыли приписати Польщу до червеного списку держав высокого ризика захворіня на COVID-19. З той причыны од понеділька закрыто граничны переходы медже Чешском Республиком а Польщом. Вынятками, котры дозваляют віхати на територию ЧР з держав высокого ризика, были обняты особы сполняючы вызначены вымаганя. Сут то м.ін. тоты, якы мают долготерміновы візы, працівникы медженародного транспорту і трансграничны працівникы, студенты, члены родин ци особы в несподіваных ситуациях. Важне єст тіж, же при візиті выже 12 годин в державі высокого ризика, аж і особы сполняючы тоты вымаганя мусят зробити тест PCR та выполнити локалізацийный формуляр. Зас подорожуючы з держав низкого ризика захворіня не сут зобовязаны мати неґативный результат тесту на присутніст Covid-19 ци быти на кварантанні. Приняты розвязаня не сут постійны і можут ся скоро змінити, вшытко єст звязане з епідемійолоґічном ситуацийом Чешской Республикы і Польщы. Припоминаме, же чешскій уряд продолжыл вынятковый стан до 20. листопада/новембра, причыном єст критична епідемійолоґічна ситуация.

Ґазифікация ґміны Устя Рускє

Війт Ґміны Устя Рускє інформує, же Польска Спілка Ґазовництва Одділ Гірничый Заклад в Кракові зачал працувати над концепцийом ґазифікациі части ґміны Устя Рускє. Проєктом обняты были села Ґладышів, Ждыня, Конечна, Смерековец, Реґєтів, Шквіртне, Квятон, Устя Рускє, Ганчова і Высова. Заінтересуваны жытелі ґміны прошены сут выполнити специяльні зрыхтувану анкєту, яку мож побрати з сайту ґміны, або одобрати од шолтысів ци в Уряді Ґміны. Выполнены формулярі треба достарчыти до Уряду Ґміны в терміні до 30. листопада/новембра.

Ґалицийска Експлоатация

Округовый Музей в Новым Санчы разом з Фондом Шанса для Сліпых та Стоваришыньом «Добрі» реализуют проґрам Ґалицийска Експлоатация. В його рамках пройдут штырі циклі творчых варштатів, якы орґанізуваны будут в працовнях Ґалицийского Місточка. Каждый цикль має інчу головну тему, буде о горцях, зыґарях, аптиці та фризиєрі. Цілю проєкту єст вказати особам з дисфункциями, як выглядало жытя на зламі XIX i XX віку. Фіналом проєкту будут штырі стрічы онлайн, реализуваны од листопада/новембра до грудня/децембра. В часі стріч запрезентуваны будут штырі части слуховиска, котре возникло в рамках проєкту, та інструктажовы фільмы, котры вказуют, як самому зробити предметы звязаны з темом стрічы. Як признає маршалок малопольского воєвідства Вітольд Козловскій, єст то не лем цікава стріча для осіб, котры не видят, але тіж нагода до промоциі Ґалицийского Місточка.

Тогорічны свята без вроцлавского Різдвяного Ярмаку

Планна відоміст для жытелів Вроцлавя і не лем. На жаль тогорічна едиция Різдвяного Ярмаку не одбуде ся. Беручы до увагы чысло заражынь та штораз більше ограничынь, не єст можлива орґанізация так великой імпрезы. Орґанізаторы не бесідуют єднак остатнього слова і кєд лем ситуация і рішыня власти дозволят, то ярмак пройде в січни/януарі або лютым/фебруарі. Не буде то типовый ярмак навязуючый до різдвяных свят, але барже акция, што підтримує традициі.