Сумар дня на 10. липця/юлия 2020 р.

Приносиме вам сумар медияльной ґрупы ЛЕМ.фм+ на ден 10. липця/юлия
2020 р.

Высокє фінансуваня священників

Дальшый уж раз пал рекорд, кєд іде о выдаткы польской державы м.ін. на складкы для священників. Змін в іх фінансуваню домагало ся аж трьох кандидатів на президента. 171 млн зл – то квота, яку взял в 2019 році Костельный Фонд. Так выходит з інформациі Міністерства Внутрішніх Справ і Адміністрациі про выконаня доходів і выдатків буджету державы в части «реліґійны віроісповіданя та нацийональны і етнічны меншыны». Фонд был основаный іщы в сталіновскым часі і мал быти рекомпенсатом за маєток одобраный Костелови. Хоснуют го вшыткы віроісповіданя в Польщы, найбільшым є католицкій Костел. З Фонду фінансуваны сут головні соспільны і здравотны складкы духовенства, в меншій ступени ремонты сакральных обєктів і благодійно-опікунча діяльніст. Што рока квота Фонду збільшат ся. До 2012 рока была низша як 100 млн зл, тепер – то 171 млн зл. Роберт Бєдронь, єден з кандидатів на президента, голосил, што Фонд треба зліквідувати. Менше радикальны были Шымон Головня та Рафал Тшасковскій. Подля них Фонд треба заступити добровільным податковым одписом. Роботы над таком зміном проходили за другой каденциі урядуваня Гражданьской Плятформы, але затримали ся, бо уряд влады і Костел не были в силі порозуміти ся, кілько мал бы выносити одпис.

Того рока не посмакуєме меду і вина

Од 20. років в Пшемкові на Нижнім Шлеску кінцьом вересня/септембра проходит Свято Меду і Вина. Традицийом пшемківской імпрезы сут выступы лемківскых выконавців. Того рока єднак ани лемківскы артисты, ани пчоларі і аматоры меду не будут мати нагоды, жебы ся зыйти. Бургомайстер Пшемкова Єжы Щупак рішыл, што не будут орґанізувати 21. едициі подіі. Вшытко через епідемічну загорозу звязану з пошырюваньом ся коронавіруса. Бургомайстер подал, што найважнійша є для него безпека і по вельох дебатах і бесідах, тіж з пчолярскым середовиском, рішыл о одкликаню подіі. Додал, што уж зберают силы і думают над атракциями на будучый рік. Дата 21. едициі свята пчолярів і продуцентів вин є уж рішена, то 25.-26. вересня/септембра 2021 рока. Традицийом Свята Меду і Вина є і правліня екуменічных богослужынь. Каждого рока недільны Службы Божы сут правлены наперемінно в єдным з трьох храмів ріжных конфесий. По службі вшыткы ідут в хороводі до парку, де проходят концерты, сут чысленны стоіска та інчы атракциі. На сцені презентували ся за попередні рокы м.ін. ансамблі Ластівочка, Сестры Бочнєвич ци ґрупа ЛемОН.

Санок-Лупків зас ожыє

В понедільок, 6. липця/юлия, выіхал зо стациі в Саноку першый потяг до Лупкова. Потягы на тій трасі обслугує фірма SKPL Cargo, а будут они курсувати в вакацийным періоді од понеділька до четверга. В вікенды пасажеры можут схоснувати потяг Вояк Швейк реляциі Ряшів-Меджелабірці-Ряшів, котрый обслугує Підкарпатскій Заклад Польреґіо в Ряшові. Потяг Санок-Лупків то першый підкарпатскій самоурядовый потяг, бо є ефектом догварінь медже Маршалківскым Урядом Підкарпатского Воєвідства, Повітовым Староством в Саноку, Урядом Міста і Ґміны Загіря та Ґміном Команча. Вакацийны перевозы з Санока до Лупкова сут реалізуваны зо схоснуваньом клясичного, великого табору, мож ним перевозити роверы та обзерати мультімедияльны материялы од самоурядів, якы промуют реґіон.

Землетрясіня од Любіна по Ґлоґів і околиці

В середу, 8. липця/юлия, по 7. годині рано, в околицях Ґлоґова і в самым Ґлоґові затрясли ся хыжы. Причыном был провокуваный одстріл в копальни ЗҐ Рудна. Выкликане ним землетрясіня было єдным з сильнійшых в остатніх роках. Сейсмоґрафы вказали 4,7 в скали Ріхтера. Было то цільове діяня в копальни КҐГМ і вшытко было забепечене без страху о жытя працівників. Трясіня чули на великій обшыри, од Любіна по Ґлоґів і околиці. В вельох хыжах заколысали ся лямпы ци пересували предметы, а жытелі послідніх плянтер высокых будинків признавали пак в реляциях, што ся зострашыли. Трясіня мало силу так званой гірничой «девяткы». Так сильне трафлят ся раз на пару років.