Сумар дня на 10. грудня/децембра 2024 р.

Приносиме вам сумар медияльной ґрупы ЛЕМ.фм+ на ден 10. грудня/децембра 2024 р.

Новы резерваты природы на Лемковині

На Лемковині, в малопольскым воєвідстві, одкрыли штырі новы резерваты природы. 4. грудня/децембра Реґіональный Директор Охороны Середовиска в Кракові підписал шытрі заряджыня о установліню новых обшыри охороны природы. Два з них находят ся в ґміні Устя Рускє, сут то «Козє Ребро» і «Марковєц-Ґрудек», в ґміні Ропа одкрыли резерват «Яворина на Хелмі», зас остатній «Тисы в Выскітній» злокализуваный єст в сусідній ґміні Ґрибів. Простір новых резерватів то коло 219 га, а як мож прочытати в поясніню іх покликаня: «выполнят діру в обшырях особливой охороны природы медже богатым в резерваты Сандецкым Бескідом а Маґурскым Парком». Новы обшыри охороны природы звязаны сут з ініциятивом основаня 100 резерватів на 100 років Державных Лісів. Вшыткы пропозициі новых резерватів прошли процес соспільных консультаций, были заопініюваны Реґіональном Радом Охороны Природы в Кракові та отримали позитивну опінію Малопольского Воєводы. Рівночасно Реґіональный Директор Охороны Середовиска в Ряшові підписал схваліня покликаня резервату «Mur Krzeczkowski», котрый єст 100 резерватом в підкарпатскым воєвідстві.

Ґміна Команча і ґміна Санкова выріжнены

Початком грудня/децембра ґміна Команча отримала выріжніня в ранкінґу «Золота сотка ґмін Підкарпатя». Ішло о підсумуваня 160 ґмін находячых ся в підкарпатскым воєвідстві за іх успіхы в попереднім році і підсумуваня 5-літньой каденциі самоурядів, іх выдатків, веденых ініциятив та проведеных інвестиций. Ранкінґ поділеный єст на 3 головны катеґориі: містецкы, містецко-сельскы і сельскы ґміны. В остатній ґрупі в підкатеґориі «Динаміка маєтковых інвестицийных выдатків підкарпатскых ґмін в роках 2019-2023» перше місце заняла ґміна Команча. Як мож чытати в комунікаті ґміны, то великє выріжніня і угоноруваня роботы цілого самоуряду, як і заанґажуваня жытелів ґміны. В малопольскым воєвідстві тіж прошло подібне підсумуваня роботы самоурядів. На початку того місяця оголосили Ранкінґ Ґмін Малопольщы за рік 2024. В першій десятці нашла ся ґміна Санкова. Ранкінґ оцінят ґміны на основі іх успіхів в ріжных обшырях, такых як економічный ци середовисковый розвиток. Єст особливым способом вказаня як ефективні самоуряды хоснуют доступны засобы і інвестуют в будуче.

«Бесіды на пограничы» стріча з Ольгом Лінкєвич

Музей Кресів в Любачові та Музей Народной Культуры в Кольбушовій просят на стрічу з циклю «Бесіды на пограничы», котра пройде в пятницю 13. грудня/децембра о 13.00 год. в музею в Кольбушовій. Бесіду поведе др Януш Радваньскій, а гостьом буде Ольга Лінкєвич, авторка книжкы «Lokalność i nacjonalizm. Społeczności wiejskie w Galicji Wschodniej w dwudziestoleciu międzywojennym». Проєкт «Бесіды на пограничы» то цикль стріч посвяченых дефініюваню і описуваню погранича, його проблемів і вартоси.. Bесіды ведены сут з участникамы прожываючыма по обох странах погранича. Стріча з Ольґом Лінкєвич пройде тіж 12. грудня/децембра в Ряшові і 15. грудня/децембра в Церковным Комплексі в Радружы.

«Карпатскы слуховиска» – прелекция про іконы

Карпатскій Народный Університет просит на остатню того рока стрічу з циклю «Карпатскы слуховиска». Тым разом прелекция під назвом «Іконы од XV до XIX в. з колекциі Історичного Музею в Саноку». Інтернетовый выклад поведе Катажына Вінніцка. Стріча пройде днес, 10. грудня/децембра о 17.00 год. Мотузок находит ся на офіцийным фейсбуковым сайті Карпатского Народного Університету.

фот. www.gov.pl