Сумар дня на 10. червця/юнія 2024 р.

Приносиме вам сумар медияльной ґрупы ЛЕМ.фм+ на ден 10. червця/юнія 2024 р.

В Ясюнці упамятнили бывшых жытелів сел Ясюнка, Крива і Баниця

Вчера, в неділю 9. червця/юнія в Ясюнці одбыла ся історична подія – посвячыня Пропамятного Креста, якій припоминат на жытелів тьрох сел – Ясюнкы і сусідніх Кривой і Баниці. Ініцятором одкрытя памятника был Михал Гайтко. Подія зачала ся Божеском Літургійом в православній церкви Покровы Пресвятой Богородиці в Ждыни. Богослужыня очелил владыка Паісий, архієпископ православной перемышльско-ґорлицкой єпархіі, якій поблагословил діло орґанізацийного комітету одкрытя Пропамятного Креста. Пак присутны участникы перешли до Ясюнкы, де владыка при участи священників і вірных посвятил памятник. Ясюнчане перед выселіньом частично приналежали до православной церкви – доходили до часовні в недалекій Баници. Селян выгнано в рамках акциі «Вісла» 9. червця/юнія 1947 р. Подля офіцийных даных выселено 182 особы. В подібным часі з Баниці выгнано 57 осіб, а з Кривой 156 осіб. На памятнику выписано вшыткы роды, якы до 1947 р. заселяли Ясюнку, Криву і Баницию.

«Лемківскє Літо» 2024

Уж в тым тыжни, в суботу 15. червця/юнія одбуде ся в Чмели на Нижнім Шлеску дальша едиция подіі пн. «Лемківскє Літо» – Дни Лемківской Культуры. Як все, одбуде ся она на рекреацийно-спортовым пляци в Чмели. Зачне ся о 14.00 год. Проґрам обнимат выступы ансамблів, в тым році почуєме м.ін. ансамблі: Ластівочка, н’лем фольк, Файна Ферайна, Розтока ци Ехо. Окрем того буде мож покоштувати традицийны лемківскы стравы зрыхтуваны місцевыма ґаздынями. Проґрам обнимат тіж рецитаторскы і вокально-танцювальны выступы діти і молодежы, плястичный конкурс, як і спортовы гры і забавы з нагородами. Буде огниско і ярмак народного ремесла. Орґанізатором подіі єст православна парохія св. Тройці в Любіні.

Обмеженый режім на граничным переході Вубля – Малый Березный

Од днес до одкликаня на граничным переході Вубля (Словация) – Малый Березный (Украіна) буде введеный обмеженый режім. Як подала словацка аґентура TASR, причыном єст реализация робіт повязаных з введіньом систему Entry/Exit. Єст то новый цілоевропейскій інформацийный систем зниманя біометриі лиця і штырьох одпeчаток пальців в припадку громадян третіх держав, котрым вычерят ся сучасне мануальне ознакуваня пашпортів печатком. Підчас робіт рух буде перерываный лем в єдным напрямі. Фунґуючый пас дорогы про вступ і выхід з териториі Словациі буде вызначеный тымчасовым значыньом. З причыны робіт може ся выдолжыти час чеканя на реченым граничным переході. Шоферів, біциґлистів і путуючых пішых просит ся о векшу увагу, дотримуваня тымчасового значыня і наряжынь фінансовой службы і поліциі.

Едукацийна стежка при окопах барскых конфедератів

Іщы в тым році має быти готова едукацийна стежка при окопах барскых конфедератів в Мушынці, коло Крениці. Замонтуваных было парунадцет таблиц, завдякы котрым туристы будут мочы познати історию тых фортифікаций. В Мушынці находят ся єдны з найліпше захованых окопів барскых конфедератів в Польщы. Жебы хоронити уміцніня, в 1963 р. одкрыто там природничо-історичный резерват “Окопы Барскых Конфедератів”, котрый єст частю Попрадского Ляндшафтного Парку. Головна таблиця вкаже, як обєкт выглядал в минулым. Таблиці вколо едукацийной стежкы будут ся односити до істориі Барской Конфедерациі, але предовшыткым до істориі обєкту. Буде мож ся запознати і з технічным аспектом Конфедерациі, тє. якє хоснували ручне, біле оружа, артилерию, як возносили фортифікациі. Власти Крениці плянуют тіж реконструкцию жолнірского табору в Мушынці, з якого по 250 роках невельо ся лишыло. Помістят там м.ін. артефакты з часів Барской Конфедерациі, котры днес сут триманы в музею в Тыличы.