Сумар дня на 10. червця/юнія 2021 р.

Приносиме вам сумар медияльной ґрупы ЛЕМ.фм+ на ден 10. червця/юнія 2021 р.

Стоваришыня Лемків кличе на конґресы

Як інформує Стоваришыня Лемків, на 3. липця/юлия был скликаный ІХ Конґрес той орґанізациі. Конґрес з причыны пандеміі одбуде ся аж тепер, но поінчы рокы все одбывал ся в першій половині рока. На ним выбераны будут новы власти СЛ, в тым ведучый, члены Головного Заряду і члены Головной Ревізийной Комісиі. Конґрес має вырішыти роботу орґанізациі на дальшы рокы. Окрем того, як інформує Андрий Копча, актуальный ведучый стоваришыня, в днях 9.-11. вересня/септембра одбуде ся в Креници Світовый Конґрес Русинів. Тогорічну орґанізацию конґресу поручено як раз Лемкам, а за його орґанізацию як членьска орґанізация Конґресу одповідат СЛ. Про деталі будеме іщы інформувати.

Творы Никыфора в Кєльцях

Од 17. червця/юнія в кєлецкым Музею Діалоґу Культур буде мож обзерати выставу творів выдатного лемківского маляря – Никыфора Креницкого. На выставі, яка потырват до кінця серпня/авґуста, презентувана буде лем невелика част з творчого доробку маляря. Музей рыхтує вказати сорок ріжного рода малярскых прац Епифана Дровняка. Будут то творы зо збірок єдиного во світі Музею Никыфора Креницкого – Округового Музею в Новым Санчы, Одділіня в Креници та малюнкы, якы находят ся в збірці Нацийонального Музею в Кєльцях. Сама выстава має і за ціль приближыти жытелям Кєльц тему Лемків і русиньской культуры. Гоноровый патронат над подійом обнял Маршалок Свєнтокшыского Воєвідства. Партнером выставы є креницкій Музей Никыфора.

Русин остал головным комендантом Мадярскых Озброєных Сил

В суботу, 5. червця/юнія, в будапештяньскым парляменті перевзял командуваня Мадярскых Озброєных Сил ґенералмайор Ромулус Русин-Сенді. Рішыньом мадярского президента Яноша Адера был на тоту посаду призначеный од 3. червця/юнія до 31. мая 2026 р. Новый головный комендант Мадярскых Озброєных Сил народил ся 5. мая 1973 р. в Мішкольци, є доктором воєньскых наук. Як уж вказує і його назвиско, має він русиньскє походжыня. Кєд в грудни/децембрі 2019 р. мадярскы Русины зышли ся в каштели Штефанія, што находит ся в Будапешті, на подіі был присутный і Ромулус Русин-Сенді. Головный ґенералмайор голосит ся ґу Русинам.

Ювілейна выстава Івана Чіжмаря

11. червця/юнія о год. 15.30 в выставных просторах Піддукляньского Освітнього Центру в Свиднику одкрыют фотоґрафічну выставу під назвом «Зо жывота Русинів», автором котрой є Іван Чіжмар. Выстава є орґанізувана з нагоды 85. народин Чіжмаря. Іван Чіжмар народил ся 12. червця/юнія 1936 р. в Сухій, дітячы рокы пережыл в Пстрині. Єст знаным русиньскым етноґрафом, музичным фольклористом, фотоґрафом і фільмовцьом. Студиювал етноґрафію і музичну фольклористику на університеті в Брні. Ціле жытя єст активный в обшыри збераня, документациі, як і інтерпретациі русиньскых народных співанок. Як сценариста брал участ при творіню фольклорных фестівалів в Свиднику, Меджелабірцях, Вышній Ольшаві. Опубликувал вельо фаховых дописів до темы Русинів. Выстава прац Івана Чіжмаря буде доступна до 12. липця/юлия 2021 р.