Сумар дня на 1. жолтня/октобра 2019 р.

Приносиме Вам сумар медияльной ґрупы ЛЕМ.фм на ден 1. жолтня/октобра 2019 р.

Вмер артиста, недождавшы ся авторской выставы

З великым жальом інформуєме, же 25. вересня т.р. до Вічности одышол Богдан Дудич (1968-2019), лемківскій артиста-різбяр, якій жыл і творил в Білянці. Уж од 80. років минулого столітя зачынал быти достеріганый в артистичным середовиску. Вырастаючы посеред церкви і ікон, якы формували його найбарже знану обшыр творчости, котром были деревяны рельєфы, представляючы іконоґрафічны выображыня, і різблены кресты, звернул на себе увагу промоторів штукы і академіцкых професорів. По отриманю в 90. роках ХХ столітя нагороды ім. Альфреда Длуґоша, його працы были выставляны в Польщы і заграницьом, а вельо з них находит ся днес в приватных руках колекцийонерів на цілым світі. Богдан Дудич одышол, маючы 51 років. Вічна Йому Памят!

Альтернатива для автомобілів

28. вересня/септембра тр. на креницкій желізничный дворец въіхал першый потяг обновленой трасы Ясло-Крениця. То Імпульс – нова модерна конструкция фірмы Неваґ, яка выіхала з Ясла о 7.35 год., приходячы до Крениці перед 11.00 год., забераючы зо собом 269 пасажерів. То тестове получыня Малополскых Желізниц, якого будуче буде залежало лем од його популярности – кєд найдут ся охочы іздити том трасом, курс буде введеный до постійного ґрафіку. Траса Ясло-Крениця може допомочы потенцияльным пасажерам, якы штоден іздят до роботы, або до школы, але через своєрідне ґеоґрафічне положыня, може остати важным елементом локальной туристикы. Переходячы через Біч, Ґорлиці, Ґрибів, Новый Санч, а дальше долином Попраду – Рытро, Пивничну, Жеґєстів і Мушыну, не єст може найскоршым способом, жебы перемістити ся з Ясла до Крениці, але, напевно, єдным з красшых.

Варголь і його віра

Музей Енді Варголя в Пітсбурґу онедолга одкрыє нову выставу, названу «Енді Варголь: Обявліня». Буде то експозиция, котра всесторонно поможе зрозуміти зложеніст духновной віры і реліґійніст артисты в однесіню до його творчости. Варголь, якій вродил ся в віруючій русиньскій грекокатолицкій родині, од молодости окруженый был сакральным артизом і духовістю, што могучо влияло на його пізнійшу карєру, яку продолжал в великым Ню Йорку. Але його пізнійшы маніфестациі віры не были просты, што вказувал в своій творчости. Король поп-арту в своіх працах покус кєпкувал, бавил ся стилями і символиком, котра выходит з істориі західнього і східнього християнства, парафразуючы іх в контексті попкультуры. Выстава «Обявліня» представит більше як 100 предметів з постійной колекциі музею, в тым чыслі і архвальны материялы, рисункы, образы і фільмы. Завдякы такым роботам як фільм о заході сонця з 1967 года і «Тайній вечері» (1986) музей хоче вказати на інтимный вид творчого процесу Варголя, представляючы свіже пізріня на артисту. Одкрытя выставы «Енді Варголь: Обявліня» заплянуване на 20. жолтня/октобра 2019 р. Выстава має быти презентувана в пітсбуржскым музею до лютого/фебруара будучого рока.

Чорнорікы будут мати свою видокову вежу

По успішным одкрытю стежкы, яком понад деревами мож од недавна ходити в Креници, обзераючы прекрасну околичну панораму, што раз більше ініциятив того рода приходит на думку декотрым локальным самоурядам, ци інчым інституциям. В Чорноріках коло Коросна має быти збудувана 13-метрова видокова вежа, з якой буде мож видіти велику обшыр м.ін. середньой Лемковины. Будова, яка уж рушыла, ведена єст в рамках проєкту «Карпатскы видокы на трансграничным туристичным пути Корчына-Стропків», а окрем того в плянах єст іщы біциґльова траса долгости 34 км, маюча враз з вежом активізувати туристичный рух в реґіоні. Подібна, лем дакус высша – 34-метрова видокова вежа, была збудувана і одкрыта в 2018 році на горі Цергова, котра возносит ся над лемківскыма селами Терстяна і Завадка Рыманівска.