Сумар дня на 1. вересня/септембра 2020 р.

Приносиме вам сумар медияльной ґрупы ЛЕМ.фм+ на ден 1. вересня/септембра 2020 р.

Школярі вертают до шкіл

Днес, по долгых місяцях перервы, хоц епідемія фурт тырват, до шкіл вертают ученикы. В самій Польщы вертат коло 4,6 млн учеників. За іх безпеку мают одповідати директоры шкіл, але то не они будут рішати о евентуальній можливости ввести вчыня на дистанс. О тым рішал буде локальный санепід. Буде то можливе лем в вынятковых ситуациях. В барже епідемічні загороженых повітах школярі з хронічныма спілістнуючыма хворотами можут вчыти ся з хыжы, але за згодом директора. На пятницьовій пресконференциі міністер едукациі Дариюш Пьонтковскій подал, што до шкіл до днес трафит в сумі 5,5 млн літрів плыну до дезинфекциі та 20 млн медичных масочок. Зрыхтувано тіж 75 тис. бездотыковых термометрів, котрых дистрибуцийом займут ся воєводы. Традицийні ведены будут тіж занятя з меншыновых языків і культуры, в тым лемківского.

«Купельна Пут» – побудуют м.ін. 12 лікуючо-регабілітацийных центрів, тіж в русиньскых селах

В минулу пятницю, 28. серпня/авґуста, председа Пряшівского Самосправного Краю Мілан Маєрскій підписал меморандум о спілпраци при реалізациі в окресі Стропків проєкту під назвом «Купельна Пут». Цілю проєкту є схоснувати мінеральны джерела і створити добры обставины для розвитку туристичного руху. В плянах є побудувати 12 лікуючо-регабілітацийных центрів, котры получены будут з біциґльовыма стежками і місцями до одпочынку. Дале – ревіталізация околиц істнуючых мінеральных джерел, модернізация дороговой інфраструктуры і інчы. В проєкт заанґажуваных буде більше сел і ґмін, в тым і русиньскы села. По реалізациі заплянуваных задач створеных буде більше як 1100 новых місц роботы. Вартіст проєкту то 250 млн евро, котры хоче окрес Стропків, якій належыт до найменше розвиненых окресів Пряшівского Самосправного Краю, здобыти з підпором державы.

Нагорода Йозефа Мілослава Гурбана для блаженного Павла Петра Ґойдича

Председа Нацийональной Рады Словацкой Республикы Борис Коллар в понедільок, 31. серпня/авґуста, поінформувал про лавреатів державной Нагороды Йозефа Мілослава Гурбана. In memoriam буде нагородженый русиньскій грекокатолицкій єпископ, блаженный Павел Петро Ґойдич. Премія вручена буде днес, як раз є то ден державного свята на Словациі – Ден Конституциі. Нагороду одбере владыка Йоан Бабяк, архієпископ пряшівскій і митрополита Словациі. Премія для блаженного Павла Петра Ґойдича має быти голдом за його поставу і діяльніст в часах переслідуваня Церкви. Грекокатолицка Церков собі того рока припоминат 60. річницю мученичой смерти єпископа. В маю была одкрыта пропамятна таблиця на вязници в Леопольдові, де вмер. В одкрытю так само брал участ і председа словацкого парляменту. Уділіньом державной Нагороды Йозефа Мілослава Гурбана выріжнят председа Нацийональной Рады Словациі особу або колектив за вынятково вызначны заслугы, результаты роботы або діяня в области леґіслятивы, права, розвитку демокрациі або конституцийности в Словацкій Республиці або в гуманітарній области.

Упамятніня в Баници коло Кривой

В пятницю, 28. серпня/авґуста, в Баници коло Кривой прошла подія упамятніня 76. річниці зостріліня польской команды з 1586. Ескадры Специяльного Перезначыня, бомбардера Галіфакс в серпни 1944 рока, котрый летіл нести поміч воюючій Варшаві. Аероплян зострілено 28. серпня/авґуста на граничній обшыри Баниці та Кривой. Згынуло товды семеро пільотів. На упамятніня приіхали представникы публичных власти, м.ін. ґорлицкій староста Мария Ґубала, війт ґміны Санкова Малґожата Малух та в імени малопольского воєводы – Йоанна Фльоркєвич-Камєнярчык, директорка Выділу Ревіталізациі Памятників Кракова і Нацийональной Спадковины в Кракові. Присутны были і члены родин помершой команды та представникы дальшых орґанізаций. Варту при памятнику выставили члены Охотничой Протиогньовой Стражы з Ґладышова та скавты з Ґорлиц.

Фот. www.powiatgorlicki.pl