Сумар дня на 1. серпня/авґуста 2022 р.

Приносиме вам сумар медияльной ґрупы ЛЕМ.фм+ на ден 1. серпня/авґуста 2022 р.

Музей Народного Будівництва в Саноку дочекал ся дофінансуваня на розбудову господарчого будинку

Іщы в 2016 р. власти музею Народного Будівництва в Саноку выступили з проєктом розбудовы до Реґіонального Проґраму Операцийного Підкарпатского Воєвідства – Охорона Натурального Середовиска та Культуровой Спадковины, реализуваного в рамках Европейского Реґіонального Фонду Розвитку. На жаль, в тым часі проєкт не заквалифікувал ся до реализациі і лишыл ся на резервовій листі. Того рока вказала ся можливіст пересунути середкы на дофінансуваня інвестиций, котрых реализация не повела ся в 2016 р. (в тым розбудовы заплеча в Саноцкым Музею). Інвестиция обнимат розбудову і надбудову маґазинового будинку в музею. Як повіл директор музею Єжы Ґінальскі, інвестиция розвяже проблем маґазинувати многы експонаты при захованю одповідньой для них безпекы. В новым будинку найде ся не лем маґазин, але тіж столярня ци мастерні до консервациі забытків. Завдякы реализациі проєкту і перенесіню столярні до нового будинку, музей буде мал додатковый поверх в забытковій части будинку, де найде ся нова выставова саля. Властям музею лишила ся лем актуализация коштів проєкту сперед 6 років і кєд вшытко добрі піде, розбудова зачне ся іщы того рока.

В підкарпатскым воєвідстві возникне новый резерват природы

Уж початком серпня/авґуста в Рудавці Рыманівскій покличут резерват «Ользы». Інформацию передал представник Реґіональной Дирекциі Охороны Середовиска в Ряшові. Находяча ся в долині Вислока скальна стіна то найбільше в польскых Карпатах одкрытя менілітовых лупків. Одкрытя єст наслідством барз помалых процесів ерозиі, а характеристичный верствовый уклад скал то осаджаня ся через долгій час гравія і піску вчас велкого Океану Тетиды. Площына резервату то понад 40 га і окрем скального одкрытя охороном обыйме він тіж деревостій, котрый поросненый єст вершок, о высоконатуральным складі. Буде то 98 резерват придорды в підкарпатскым воєвідстві.

Вакацийны атракциі в Маґурскым Парку

Маґурскій Нацийональный Парк просит на дальшы вакацийны стрічы. Дармовы природничы варштаты для діти проходят в кажду вакацийну середу о 10.00 год. в Едукацийно-Музейным Осередку Маґурского Нацийонального Парку в Крампній. Для дорослых і родин працівникы зрыхтували цикль штотыжньовых прогульок по Парку. В тым тыжни парковый едукатор буде присутный 2. серпня/авґуста од 9.00 до 14.00 год. на природничій стежці «Свіржова Руска». Про деталі дальшых прогульок будут інформувати на фейсбуковым сайті Парку.

Ґміна Санкова з новом трансграничном спілпрацом

Ґміна Санкова разом з партнерами з Мадяр, Чех і Словациі реализує проєкт «Трансгранична спілпраца для партнерства і добробыту». Проєкт спілфінансуваный єст з Вышеградского Фонду, а головным партнером єст Союз Міст і Ґмін Словациі з Братиславы. Перша стріча в рамках проєкту прошла в половині липця/юлиця на Мадярах, а єй темом была «Енерґетична ефективніст в самоуряді». Наступна стріча пройде в вересни/септембрі т.р. в Санковій під гаслом «Туристика – важна обшыр спілпрацы держав V4».