Сумар дня на 1. марця 2021 р.

Приносиме вам сумар медияльной ґрупы ЛЕМ.фм+ на ден 1. марця 2021 р.

Дозволены лем масочкы

Од минулой суботы, 27. лютого/фебруара, єдином дозволеном опцийом закрываня ґамбы і носа в публичным просторі сут масочкы. Закрывати ґамбу не мож уж м.ін. хустом ци наличником – можут быти они хоснуваны лем як додаткова охорона окрем масочкы. Поліция апелює стосувати ся до новых ограничынь і горозит мандатами. Высокіст мандату за недостосуваня ся до записаного в уставі обовязку носити масочку то аж і 1000 злотых.

Рада Ґорлицкого Повіту не хоче централизациі шпыталів

Рада Ґорлицкого Повіту выразила непокій звязаный з урядовыма плянами реструктуризациі шпыталів, тє. перенятя державом самоурядовых шпыталів. 25. лютого/фебруара Рада выдала в тій справі офіцияльне становиско. Выражат в ним вантпливіст, ци нацийонализация шпыталів або буд-яка інча зміня властиеля без збільшыня фінансовых середків на охорону здоровля і спілпрацы медже представниками шпыталів і підметами творячыма зміны в системі охороны здровля поліпшыт іх фунґуваня. Подля радных плянувана централизация медичных підметів може довести до ограничыня доступу громадян до здравотных свідчынь.

Ґорлицка ґастрономія звільнена з оплат за алькоголь

Рада Міста Ґорлиці приняла схваліня, якє мало бы помочы потерпілым в наслідстві епідемічных ограничынь локальным підприємцям діючым в ґастрономічній бранжы. Локалі, якы в періоді епідеміі зрезиґнували з продажы алькоголю, будут звільнены з 2/3 річной оплаты. Для рівного трактуваня підприємців, котры в тым часі продавали алькоголь, рішено, што звернена ім буде част оплаты высша як 1/3 высокости оплаты вырахуваной для локалю за цілый рік. Такє розвязаня має спричынити пропорцийональны кошты діяльности для вшыткых підметів ведучых продаж алькоголю.

Повстає православна середня школа

В Варшаві повстає нова середня школа ведена Стоваришыньом Православне Братство свв. Кірила і Методия. Школа має рушыти в шкільным році 2021/2022 при ул. Бронєвского в Варшаві. Окрем типовых предметів середньой школы Стоваришыня запевнит ученикам додатково выховавчы занятя і з православной духовности. Актуально орґанізация веде в інчых містах православны предшколя і основну школу.

Плястичный конкурс «Остан приятельом гір»

Солотвины Арена просит до участи в плястичным конкурсі для діти «Остан приятельом гір», орґанізуваным Ґрупом Пінґвіна. Конкурс єст направленый на діти в віку 7-10 років. Має на ціли звернути уваху на мудре і безпечне захованя в горах і потребу дбати о іх чыстоту. Задачом участників єст запроєктувати почтову картку звязану з єдном з двох тем: Безпечны в горах або Чысты горы. До выграня м.ін. білеты вступу на Видокову Вежу в Креници, а найліпшы почтовы карткы будут выдрукуваны і доступны во вшыткых лыжно-роверовых пунктах Ґрупы. На знимкы конкурсовых прац орґанізаторы чекают до кінця марця.