Сумар дня на 1. лютого/фебруара 2023 р.

Приносиме вам сумар медияльной ґрупы ЛЕМ.фм+ на ден 1. лютого/фебруара 2023 р.

Познай Лемковину з Васильом

Стоваришыня ім. Мирка Нагача «Білый Соків» зреализувало проєкт пн. «Łemkowskie Poszukiwania. Questing. Лемківскє Гляданя», котрого ефектом было опрацуваня свого рода туристичного провідника. «Questing. Лемківскє гляданя» має форму мапкы з вызначеном трасом прогулькы і місцями, в котрых можеме ся затримати – дыхнути сой, але головні – кусцьок ся про них дознати. Опрацуваня обнимат вершуваны, двоязычны (по польскы і по лемківскы) описы десятьох выбраных локализаций, котры з огляду на своі природничы і культуровы приметы сут інтересуючом пропозицийом на активный одпочынок. Старт і мета находят ся в Ґладышові. Пут веде дале через Баницю, Чорне, Радоцину і Ждыню. По дорозі пристанкы заплянуваны сут м.ін. при ґладышівскій школі, при церкви, Лемківскій Едукаицйній Загороді, при жытлисках бобірв ци при місцях памяти: при памятнику авіакатастрофы Галіфакса в Баници, памятнику св. Максима Сандовича і Жертв Лаґру в Талергофі в Чорным, та при церквиску в Чорным і цмотнери. Посліднім пунктом вандрівкы є Ждыня і находяче ся гын МініЗОО. Стоваришыня ім. Мирка Нагача «Білый Сокіл» надрукувало і розпровадило веце як 1000 мапок того квестінґового опрацуваня. Мож іх одобрати (дармо) м.ін. в Рускій Бурсі в Ґорлицях.

Іщы не тепер Нижньошлезском Желізницьом в горы і над море

Нижньошлезска Желізниця хоц має уж ліценцию на получыня в горы, то не може іщы урухомити получыня до Закопаного. Почекати треба іщы і на курсы над море. Два рокы тому Нижньошлезска Желізниця оголосила плян урухомити сезоновы получыня в популярны місця. Кінцьом 2021 р. Уряд Желізницьового Транспорту дал згоду установити получыня в реляциі Ґлоґів-Вроцлав-Закопане, а в квітни 2022 р. – жебы повести склады над море, трасом з Вроцлавя през Ліґницю, Любін і Ґлоґів до Свіноуйстя. Єднак в сезоні 2022/23 не повело ся ввести до річного розкладу ізды ани єдного получыня. Бракує іщы апробаты ПКП Польскых Желізницьовых Леній, котры приділяют перепустовіст на заряджаных собом леніях. В звязку з модернізацийом стациі Закопане є там обнижена перепустовіст і хоц передвиджена є до кінця 2023 рока, то Нижньошлезска Желізниця за пізно зложыла внесок о вымогы переіздів в рамках річного розкладу ізды. В такым выпадку Нижньошлезска Желізниця завезе пасажерів в горы найскорше в грудни/децембрі 2024 рока, коли войде в жытя черговый річный роклад ізды. В примірі трасы над море – о кілько Нижньошлезскій Желізници поведе ся опрацувати пропозицию получыня, котрым «вмістит ся» в свобідне місце на тій так само популярній трасі, то є шанса, што приділяючы перепустовіст ПКП Польскы Желізницьовы Леніі згодят ся ввести тоту реляцию в розклад ізды 2023/2024.

Конкурс для Кружків Сельскых Ґаздынь о Нагороду Жены Президента Польской Республикы

Іщы до 12. марця тырват набір до ІІІ едициі конкурсу для Кружків Сельскых Ґаздынь о Нагороду Жены Президента Польской Республикы. Темом тогорічной едициі сут «Жнива та звыкы свята вроджаю». На потребы конкурсу треба зрыхтувати 4 стравы зо схоснуваньом комперів, в тым дві пропозициі реґіональной кухні, і єдну авторску. Друга част зголошыня обнимати має обряд/звык звязаный зо жнивами характеристиный для реґіону репрезентуваного Кружоком Сельскых Ґаздынь. Представліня має мати форму словно-музично-руховой інсценізациі, што тырвати має до 4 минут. Нагороды за першы три місця выносят одповідньо: 10, 6 і 4 тис. зл. Дрібницьовы інформациі найдете на сайті prezydent.pl.

Ци вєтнамска меншына буде узнана?

До 10. лютого/фебруара мож коментувати пропозицию зложену Міністерством Справедливости Словацкой Республикы односно вызнаня вєтнамской соспільности нацийональном меншыном на Словациі. Материял до меджересортового коментуючого процесу опубликували на порталі Slov-lex. Уряд полномічного влады СР про нацийональны меншыны не має ниякых коментарів односно передложеной пропозициі, але полномічный Ласло Буковскій припоминат, што подібне жаданя высловлює і ґуральска меншына. В посліднім списуваню жытелів в 2021 році на Словациі вєтнамску нацийональніст подали 2793 особы, 489 подало єй як другу нацийональніст. Офіцияльні не были публикуваны даны о тым, кілько люди приголосило ся ку Ґуралям, але за нашыма інформациями то было коло 5000 люди.