Сумар дня на 1. лютого/фебруара 2022 р.

Приносиме вам сумар медияльной ґрупы ЛЕМ.фм+ на ден 1. лютого/фебруара 2022 р.

Поміч Украіні

Польска Гуманітарна Акция апелує о пильну підпору жытелів східньой Украіны. Грошы зо специяльной колекты схоснуют на поміч для осіб, якы жыют близко леніі фронту. Хоц война на сході Украіны тырват уж од 2014 рока, то найблизшы тыжні можут вказати ся критичны для 5 млн осіб, якы жыют вдолж долгой на 420 км леніі фронту. Близко 3 млн з них потрібує гуманітарной помочы. В великій мірі сут то хворы, самітны, старшы жены, котры не хотіли або не могли лишыти своіх хыж. В звязку зо сподіваном ескаляцийом оружного конфлікту Польска Гуманітарна Акция зачала специяльну колекту грошів потрібных, жебы купити ідло і гіґієнічны продукты для найбарже загороженых войном жытелів луганьской і донецкой области. Передана єдноразова поміч старчыт на 3 зимовы місяці.

– бесідує Гелена Краєвска з ПГА.

В Зимній Воді роботы при церкви

Уряд Ґміны Любін опубликувал на сайті анализу фінансів презначеных на ремонты памятниковых храмів, з котрой мож дознати ся, якы роботи вели в поєдных парохіях. Серед семох бенефіциєнтів нашла ся єдна православна парохія – то парохія Успінія Пресвятой Богородиці в Зимій Воді. В 2021 році провели гын першый етап ремонту памятникового огороджыня і роботы забезпечаючы конструкцию мурів довкола цмонтеря і будинку церкви. Ціліст робіт коштувала близко 90 тис. зл, з чого дотация ґміны Любін вынесла 30 тис. зл, Міністра Культуры і Нацийональной Спадковины коло 54 тис. зл, решту заплатила православна парохія зо своіх середків. Парохія в Зимній Воді є безпосередньо повязана з акцийом «Вісла». Першым єй парохом од 1947 рока был о. митр. Йоан Левяр, а творило єй двадцет єден русиньскых родин з Бортного на Лемковині та двадцет родин Украінців з Холмщыны. До парохіі в Зимній Воді приналежат вірны з сусіднього Лісця, настоятельом православной парохіі в Зимній Воді є отец Славомир Кондратюк.

Дуло в цілій Польщы

В минулый вікенд в звязку з погодом пожарникы інтервеніювали близко 18 тис. разів, з чого 1600 інтервенций было в суботу, а близко 16 390 в неділю до пілночы. Поінформувал в понедільок пресовый представник головного коменданта Державной Протигоньовой Стражы бриґ. Кароль Кєжковскій. В Малопольщы лем в неділю пожарникы інтервеніювали коло 650 разів, з чого парудесят інтервенций было на обшыри ґорлицкой землі. Як подал Дариюш Сурмач, пресовый офіцер ґорлицкых пожарників, найвеце выіздів было до поваленых на дорогы дерев. Дерева бльокували воєвідскы, повітовы і ґмінны дорогы, але падали тіж на телекомунікацийны ци енерґетичны сіти. В пятьох примірах пожарникы забезпечали пошкоджены од вітру дахы на господарчых будинках. В діянях брало участ близко 200 пожарників.

О бескідскых збійниках і не лем

Вчера в Уряді Міста Біч прошла популярнонаукова конференция пн. «Бічска Школа Катів – Факты і леґенды» будуча підсумуваньом медженародного проєкту реализуваного в рамках Европейского Фундушу Реґіонального Розвитку Інтерреґ Польща-Словация 2014-2020 пн. «Мастер Святой Справедливости на карпатскых шляках бескідників, Біч-Бардиів». В рамках того же проєкту перед парома місяцями на бічскым рынку станула статуя ката, в тюрмі ката бічского ратуша урухомлено мультімедияльну експозицию, печатали тіж принагідну публикацию, з рефератами выголошеныма вчас вчерашньой конференциі, тыкаючыма м.ін. збійництва на польско-словацкым пограничы.