Сумар дня на 1. липця/юлия 2022 р.

Приносиме вам сумар медияльной ґрупы ЛЕМ.фм+ на ден 1. липця/юлия 2022 р.

Представникы МВСіА стрітили ся з полномічныма воєвідств дс. меншын

22. і 23. червця/юнія проходила стріча представників Міністерства Внутрішніх Справ і Адміністрациі з особами з поєдных воєвідств, што сут одповідальны за справы нацийональных і етнічных меншын та соспільности, котра хоснує реґіональный язык. Цілю стрічы было вымінити ся актуальныма інформациями м.ін. в обшыри реализациі задач тыкаючых підтриманя культуровой і языковой достоменности нацийональных і етнічных меншын і соспільности хоснуючой кашебскій язык. Участникы стрічы бесідували тіж м.ін. о способах пошырюваня знаня о меншынах, іх языку, істориі ци культурі, а тіж о плянуваных механізмах признаваня дотаций на 2023 рік. Представникы воєвідств вказали на потребу цикличных стріч, бо дозваляют они выміняти ся досвідчынями, омавляти політику добрых практик і успішні выміняти інформациі.

Вертат вакацийне желізницьове получыня «Włóczykij»

Уж заран вертат желізницьовый курс Крениця – Ясло. Получыня мало свою премєру перед роком. В минулы вакациі тішыло ся оно великым заінтересуваньом і схоснувало го вельох туристів. Першый вакацийный курс «Włóczykij» рушыт 2. липця/юлия і курсувал буде кажду суботу і неділю аж до 28. серпня/авґуста. Потяг рушыт з Ясла рано о год. 6.29, а в Креници буде о 9.29. Поворотный курс рушыт з Крениці о 17.28, а в Яслі буде на 20.55. Потяг буде ставал м.ін. на стациях Біч, Ґорлиці Загіряны, Ґрибів, Новый Санч, Пивнична і Мушына. В Мушыні буде ся мож пересісти на вакацийне желізницьове получыня до словацкого Попраду. В Креници на охочых ждал буде безплатный автобус, котрым мож буде доіхати до єдной з найбарже знаных креницкых атракций, до видоковой вежы. Білет з потягу «Włóczykij» дає право тіж до 10% знижкы на ріжного рода атракциі, котрых список находит ся на страні Креницкой Туристичной Орґанізациі.

Неодолга завершат роботы на креницкым Дептаку

Як поінформувал бургомайстер Крениці Пьотр Рыба, неодолга завершат роботы на креницкым Дептаку. Так само сквер медже Дептаком і улицьом Еберса має быти готовый до кінця будучого тыжня. Наступны інвестициі то будова амфітеатру і друга част загорід на Парковій Горі. Місто має уж позволіня на будову обох обєктів. Завдякы будові амфітеатру не треба уж буде будувати тымчасовой сцены на Дептаку ци стадийоні. Обєкт має стояти в центрі міста, зараз при нижній стациі колейкы на Паркову Гору. На розбудову загорід на Парковой Горі Крениця достала дофінансуваня в высокости 5 млн злотых, і близко 10 млн зл на будову амфітеатру

Друга річниця смерти бл. п. Богдана Ґамбаля

Заран выпадат друга річниця смерти нашого камарата Богдана Ґамбаля (1965-2020). В суботу, 2. липця/юлия просиме вшыткых бурсаків, приятелів і знаємых Покійного на богослужыня, якє буде одправлене о 10.00 год. в каплици на Святій Горі Явір. Богдан Ґамбаль вмер 2. липця/юлия 2020 р. Был ініциятором реактивуваня на основі первістного статуту Стоваришыня «Руска Бурса» в Ґорлицях. Был пак долголітнім і вельократным ведучым той орґанізациі. Основал в 2011 р. перше лемківскє радийо ЛЕМ.фм, занимал ся ідейом Лемківского Інституту. Был вызначным лемківскым політиком і діячом. Будувал, а радше одраджал, єдніст серед вшыткых Карпатскых Русинів. Был залюбленый не лем в Лемковині, але і Пряшівскій Руси – в єй істориі, культурі і людях. Вічна Йому Памят!