Сумар дня на 1. квітня/апріля 2020 р.

Приносиме вам сумар медияльной ґрупы  ЛЕМ.фм+  на ден  1.  квітня/апріля 2020 р.

Дальшы рестрикциі звязаны з коронавірусом

По ограничынях введеных в польскій державі в звязку з пошырюваньом ся коронавіруса, польскій премєр Матеуш Моравєцкій на вчерашній конференциі представил дальшы рестрикциі. До ограничынь, якы были введены польскым урядом влады, дошли м.ін. заказ входити до парків, на бульвяры і променады, особы ниже 18-ох років не можут переміщати ся без опікы дорослых, закрыты сут вшыткы услуговы ґабінеты і сальоны та готелі і нічліговы місця, перед входом до склепу треба обовязково наложыти рукавичкы. Додатково введено ограничыня што до чысла осіб в склепі, на почті ци торгу. Выбрати ся мож лем на коротку прогульку, ци то перейти ся, ци выйти з псом, а як іде з нами іщы єдна особа, мусит ся тримати 2 метры од нас, тыкат ся тото тіж родин. На улицях буде веце поліцийных патролів. Недотримуваня заказів або недостосуваня ся до наказів горозит грошовом каром до 30 тис. зл.

Здальны лекциі по русиньскы

Міністерство Освіты Сербской Республикы урухомило окрему підстрану на своім сайті, на котрым находят ся вшыткы зреалізуваны дотепер лекциі на дистанс вшыткых осмох меншыновых языків, в котрых проходит вчыня, в тым по русиньскы. Курсы реалізуваны сут од 23. марця для осмох кляс основной школы. В едукацийным репозиторию находят ся лекциі награны через меншыны во спілпрацы з RT Vojvodina та з локальныма медиями. Через реалізацию тых проґрамів міністерство хоче підперти учытелів і родичів, коли реґулярне вчыня з увагы на пандемію не єст можливе. Міністерство апелювало тіж до меншыновых учытелів, жебы підперли своіх школярів в тій особливій ситуациі, а тіж жебы дополняли материялы до вчыня. На сайті rtsplaneta.rs мож слідити актуальну розписку емітуваня лекций. Окрем занять з меншынового языка находят ся там лекциі і з інчых предметів.

Выдолженый термін складаня PIT-ів

Ресорт Фінансів в Польщы выдолжат термін складаня річной деклярациі податку од особистых доходів. Стандардово мал він минути 30. квітня/апріля, тепер буде то конец мая. Особам, котры розраховуют ся на друках PIT-37 і PIT-38 (м.ін. доходы з умів о роботу ци замовліня), а то більше як 21 млн осіб, услуга Твій e-PIT, што ся находит на сайті podatki.gov.pl, оферує автоматичні выґенеруване податкове розрахуваня. Коли не появит ся гын нияка активніст, буде оно заакцептуване. Кєд вкаже ся, што зрыхтуване і заакцептуване скарбовом адміністрацийом розрахуваня треба буде поправити, буде мож то зробити до кінця наступного місяця. До того часу буде мож і додати або змінити громадску орґанізацию, на котру хочеме передати 1% свого податку.

Литовці будут мати свою телевізию

Єдна з 9 вызнаных в Польщы нацийональных меншын (Лемкы вызнаны сут як окрема етнічна меншына), Литовці, од осени тр. на Сувальщыні будут мочы обзерати телевізию LRT Lituanica. Дотепер могли тот канал обзерати лем жытелі приграничной стрефы. Трансмісия буде можлива на основі догваріня медже Міністерством Комунікациі в Польщы а Литовскым Радийом і Телевізийом та Литовскым Центром Радия і Телевізиі. LRT Lituanica оферує цілодобовый проґрам, авдициі реалізує литовска публична телевізия. Міністер комунікациі Ярослав Наркєвич зазначыл, што треба, жебы представникы каждой нацийональной меншыны мали лучніст зо свойом нацийом. Ініциятива надаваня наземной цифровой трансмісиі LRT Lituanica в реґіонах, якы граничат з Литвом, находит ся в затвердженым через польскій уряд влады пляні реалізациі проґраму розвитку Ґлобальной Литвы та заанґажуваня Литовців за границьом в жытя литовской державы.