Сумар дня на 1. грудня/децембра 2020 р.

Приносиме вам сумар медияльной ґрупы ЛЕМ.фм+ на ден 1. грудня/децембра 2020 р.

Віртуальный Різдвяный Ярмак

Од пятниці, 27. листопада/новембра, аж до 31. грудня/децембра мож взяти част в Віртуальным Різдвяным Ярмаку. До участи просит Округовый Музей в Новым Санчы, орґанізатор шторічного Різдвяного Ярмаку. Передсвяточна ініциятива од років тішыт ся великом популярністю не лем серед жытелів міста, але тіж околичных сел. Цілю ярмаку єст дати можливіст запрезентувати ся локальным творцям і іх выробам, што сут звязаны з святочном традицийом реґіону. Того рока зо взгляду на пандемію і безпеку участників, імпреза перенесла ся до віртуального світа. Промоция творців ведена буде на фейсбуковых странах «Ґалицийскы Ярмакы» і «Віртуальный Різдвяный Ярмак». В часі ярмаку вшыткы зголошены учасникы будут мочы продавати своі выробы, котры навязуют до традициі свят і реґіону. Зголошыня сут фурт приниманы, треба лем выполнити формуляр і выслати го на адрес Ґалицийского Місточка і заплатити. Більше деталів находит ся на офіцийным сайті Музею.

«Бучынова» – нова природнича стежка в Низкым Бескіді

Уж можна вандрувати по новій природничій стежці зрыхтуваній і означеній Маґурскым Нацийональным Парком. Нову атракцию рыхтувал Парк разом з Ґміном Санкова і Надлісництвом Ґорлиці. Єст то шеста того рода стежка, котра дакус ріжныт ся од решты. Нову пут названо «Бучынова» і єст то перша монотематична стежка в Парку. Веде она по західній части пасма Вонтковской Маґуры і має форму колічка, котре зачынат і кінчыт ся в Вапенным. Найвысшым пунктом стежкы єст верх Фердель. Як бесідує уж сама назва, траса присвячена єст букам, котры творят деревостан в найвысшій части пасма. Пут складат ся з шестьох затриманок з описами природы і істориями, а головном атракцийом єст видокова вежа на верху Фердля. На офіцийным сайті Маґурского Нацийонального Парку находит ся провідник по новій пути, в котрым сут мапа та знимкы і описы новой стежкы.

Ремонт повітовой дорогы Ропа-Границя Державы уж в 2021 році

В пятницю, 27. листопада/новембра, в Повітовым Старостві підписано догваріня на ремонт повітовой дорогы Ропа-Высова-Бліхнарка-Границя Державы. Вартіст інвестициі то більше як 3,8 млн зл. Ремонт можливый єст завдякы дофінансуваню з Фондів Самоурядовых Доріг. Задача закладат выміну конструкциі верхньой верствы в пошкодженых місцях на долгости блиско 1,5 км. Плянуваный термін реализациі інвестициі то май 2021 рока.

Етноґрафічный фільм о Лемковині

TVP Краків на замовліня Маршалківского Уряду реализує етноґрафічный фільм о Лемковині. Авторком образу єст Інка Боґуцка. Од 2008 рока звязана єст з TVP Краків, де реализує соспільны, психолоґічны репортажы і документальны і етноґрафічны фільмы. Єй продукциі были номінуваны і нагороджуваны в многых фільмовых фестівалях. В 2014 році была номінувана до престіжовой журналистичной нагороды Grand Press, а в 2015 отримала І Нагороду Журналисты Малопольщы за репортаж «Непотрібный творця». В єй найблизшым проєкті о Лемках мож буде видіти лемківскы ремесла і традициі. Сценарий тіж не буде припадковый. В часі обзераня образу мож буде подорожувати од церкви в Бортным через сандецкій скансен до Музею Никыфора. О Лемках оповідати будут етноґрафы, але і поеты, як напр. Петро Мурянка, а в лемківскых традициях і піснях запрезентує ся ансамбль Руты Увіты. Покля што докладна дата премєры фільму не єст знана.