Сумар дня на 1. червця/юнія 2021 р.

Приносиме вам сумар медияльной ґрупы ЛЕМ.фм+ на ден 1. червця/юнія 2021 р.

Кінцьом рока мож буде одвиджати град в Мушыні

Быти може іщы того рока можна буде одвиджати середвічный град в Мушыні. Од грудня/децембра 2020 рока тырват його реконструкция і розбудова разом з заґаздуваньом обшыри вколо горы Башта, на котрій находит ся град. Як подал бургомайстер Мушыны Ян Ґольба, пляново інвестиция мала ся закінчыти аж в будучым році, але вшытко іде в добру страну, жебы реконструкция закінчыла ся іщы того рока на осін. Як підкрислят бургомайстер, єст то барз добра новина – ґміна буде могла скорше зачати наступны заплянуваны інвестициі. Єдном з них буде будова видоковой вежы, котра єст тепер в фазі проєктуваня.

Ансамбль Руты Увіты выступил в Любостроню

В суботу, 29. мая, в палаци Любостронь, на запрошыня Куявско-Поморского Центра Культуры, выступил ансамбль Руты Увіты разом з ведучом Юлийом Дошном. Ґрупа запрезентувала ся з репертуаром лемківксых, украіньскых, білорускых і польскых пісен в аранжациі Лукаша Дошны. Джерелом інспірациі сут співанкы зобраны і записаны знаныма етноґрафами, Оскаром Кольберґом ци Романом Раінфусом, але тіж пісні з народной культуры. О музичну оправу концерту задбал Мирослав Боґонь, котрый заграл на акордеоні і корбовій лірі. Ансамбль Руты Увіты рыхтує ся выдати наступну платню, перша пн. «Пісні Жен» мала премєру в 2018 році.

Бєщадска Лісова Желізниця і нова атракция

Од половины мая можна іздити Бєщадском Лісовом Желізницьом, а найправдоподібнійше уж початком червця/юнія на туристів ждала буде нова атракция – подорож недавно выремонтуваным паровозом. Направом старого поізду заняли ся працівникы Скансену Желізницьового Табору в Хабівці. Покля што власти Фундациі Бєщадской Лісовой Желізниці ждут на одповідні дозволіня, пак паровіз буде міг тягнути вагоны на вызначеных трасах, Майдан-Бальниця-Майдан і Майдан-Должыця-Майдан. Як підкрислил презес фундациі, цілю інвестициі єст вказати забытковый поізд не як памятник, а як машыну, котра выкличе спомины в старшых осіб, а для молодых буде добром лекцийом істориі. На тоту хвилю фундация ма три паровозы, два одремонтуваны, котры можут возити туристів, і єден, што ся находит в Скансені.

Гірскы Орлы приіхали до ґорлицкого повіту, жебы заняти ся цмонтерями з І світовой войны

Клюб Гірскы Орлы діє уж понад 30 років при Столичній Коменді Поліциі. Його членами сут поліциянты в активній сужбі, а тіж тоты на пенсиі, іх родины ци цивільны працівникы поліциі. Цілю клюбу єст не лем тримати порядок на цмонтерях, але тіж пропаґувати ріжны формы туристикы. Што якісый час клюб приходит тіж на цмонтері з обшыри Ґорлиц. В днях од 20. до 23. мая Гірскы Орлы заняли ся аж 8 цмонтерями з Лемковины: в Баници, Сярах, Маластові, Ропици Рускій і Ґладышові та в неістнуючых уж селах Долгє і Липне. В залежности од стану цмонтеря, в рамках прац прятали, косили траву або малювали кресты ци огороджыня.