Сумар дня на 09. квітня/апріля 2020 р.

Приносиме вам сумар медияльной ґрупы ЛЕМ.фм+ на ден 10. квітня/апріля
2020 р.

Локальны желізниці продолжают ограничыня

Пандемія коронавіруса влият на ріжны сферы. Влинула і на желізниці, так державну, як і локальну. Такой одраз по введіню на обшыри Польщы стану епідемічного загорожыня м.ін. Нижньошлезска і Малопольска Желізниці ввели деякы ограничыня в пляні курсуваня потягів. Тепер Малопольска Желізниця заявилa, што обовязуючы ограничыня будут продолжены што найменьше до кінця квітня/апріля. Інформує она, што рішыня такє было підняте спільно з орґанізатором желізниці – самоурядом малопольского воєвідства. Причынил ся ґу тому факт, што краківскы локальны потягы не мают по што ходити на місцеве летовиско і назад. Буд-якы цивільны получыня в Медженародным Аеропорі Краків-Балиці так само сут одкликаны. Малопольска Желізниця інформує, што ограничыня будут такы як дотепер. Як раз на леніі Краків Головный-Аеропорт буде стримана дальше більшіст получынь. На окремых трасах, м.ін. в страну Лемковины, як з Кракова до Нового Санча ци Ясла, так само будут дальше обовязувати ограничыня. Найліпше провіряти вшытко на страні желізниці. Подібны рестрикциі ввели і інчы. На сайті Нижньошлезской Желізниці мож найти список получынь, котры сут ограничены або доцяп одкликаны.

Пряшівскій Край боіт ся о своі фінансы

Знижыня поділовых податків в звязку з коронавірусом є для Пряшівского Самосправного Краю затля порахуване на 38 мілийонів евро. В понедільок тоту інформацию подала на бріфінґу ведуча одділіня фінансий жупы Даґмара Олекшакова. Як повіл жупан Мілян Маєрскій, власти хотят утримати головно робітніст. Подля Олекшаковой страты роснут головно в повязаню з кроками проти пошырюваня віруса в социяльных заряджынях, на урядах ци в інчых орґанізациях, котрыма край заряджат. Маєрскій повіл, што через найблизшы два рокы, подля него, правдоподібно не будут найвекшыма інвесторами краю приватны фірмы, але публичны інституциі. За його словами то буде головно Высшый Територияльный Цілок або штат через Словацку Справу Доріг, може автострады. Зато пряшівскій край хоче выужыти фінансы, котры приходят з поділовых податків, головно на інвестуваня до краю, будуваня заряджынь і доріг, жебы люде мали роботу. Додал, же вельо з тых, котры вертают з заграниці, робили як раз в обшыри будівництва.

Дни Ґорлиц одкликаны

То уж певне. Тогорічны Дни Ґорлиц ся не одбудут. Подія была офіцияльно одкликана. Причыном є тырваюча пандемія. Як інформували орґанізаторы, тото рішыня выкликал тіж факт, што фурт росне чысло зараженых коронавірусом. Прото тіж не сут они в силі задеклярувати, ци тогорічны Дни Ґорлиц даст ся перенести на інчу дату в тым році. Кєд ніт – едиция імпрезы в 2020 році ся не одбуде. Одкликаны были тіж товаришучы імпрезы: ІІІ Клясична Ґорлицка Маівка, ІІІ Медженародный Пілмаратон «Битва під Ґорлицями» Ґорлиці-Лужна, як і реконструкция ґорлицкой битвы, про што сме уж інформували в нашых новинах. Кєд лем поведе ся побороти епідемію, орґанізаторы одраз будут інформувати про дальшы крокы.

Ревіталізация Бульварів Дітля

В Креници зачала ся ревіталізация Бульварів Дітля. То єдна з векшых фінансовых інвестиций міста, котра єст рахувана в мілийонах золотых – а докладні єй вартіст то 13 млн зл. В рамках модернізациі Бульварів буде перероблене корыто рікы Креничанка, перебудувана дорога і ходник. Як інформувал бургомайстер Крениці Пьотр Рыба, хоц тырват пандемія коронавірса, вшыткы інвестициі, котры місто скорше наплянувало, сут реалізуваны без ниякых проблемів. Припомнийме, што Бульвары Дітля то єдна з головных артерий Крениці. Ведут они долов містом на креницкій дептак. На выжнім кінци Бульварів находит ся памятник нашого Никыфора Креницкого. Од самых Бульварів одходит і алея Никыфора. Горі містом доходят і они до нового ронда на крижівці улиц Пілсудского і Здройовой. Як заявлял Рыба, помалы кінчыт ся інча інвестиция – на креницкій Поляні Янівка. Конец передвиджено на май того рока.