Сумар дня на 07. мая 2020 р.

Приносиме вам сумар медияльной ґрупы ЛЕМ.фм+ на ден 07. мая 2020 р.

Лемківска Ватра на Чужыні перенесена на вересен

Як інформувал нашу редакцию ведучый Стоваришыня Лемків Андрий Копча, є мало реальне, жебы тогорічна, 40. Лемківска Ватра в Михалові одбыла ся в заплянуваным терміні, значыт 7.-8. серпня/авґуста. Стоваришыня Лемків рахує на тото, же кєд в вакацийным періоді не буде змогы зорґанізувати подіі, быти може поведе ся ю перенести на місяц вересен/септембер. Андрий Копча має надію, што Ватру в Михалові даст ся провести в околицях 12. вересня/септембра. Як зазначыл, товды подія тырвала бы лем єден ден, хоц пару годин, жебы символично одзначыти єй сорокову едицию. Ци і коли буде остаточне рішыня власти Стоваришыня Лемків, залежне є од ситуациі з пандемійом, а тіж од рішынь польскых власти і рестрикций, котры, покля што, сут постепенно одкликуваны. Як сме інформували перед парома днями, Стоваришыня Лемків змушене было одкликати свою майову подію – ХІ Медженародне Бієнале Лемківской/Русиньской Культуры в Креници. Кєд ся поведе і оно одбуде ся на осін.

Коли новый цмонтір в Ґорлицях?

Є уж готовый проєкт нового комунального цмонтеря в Ґорлицях. Фурт єднак не знатя, коли мала бы ся зачати його будова. Потрібный буде тіж інвестор. Єдном з причын браку точной даты будовы нового цмонтеря єст факт, што ніт покля што скрижуваня на воєвідскій дорозі но. 993 близко улиці Дукляньской, на котрій мал бы ся находити новый містецкій цмонтір. Без зъізду на спомянутым скрижуваню не може быти бесіды о будові новой некрополиі. Як інформувал віцебургомайстер Ґорлиц, будова крижівкы єст поділена на два етапы. Першый уж был зреалізуваный, а другій, як надіют ся власти, буде реалізуваный іщы в тым році. Проєкт нового цмонтеря закладат побудуваня каплиці і погребового дому з трупарньом. Од головной алеі будут одходити бічны. Будут выділены місця на традицийне хованя (труны), але тіж побудуваны місця на урны – колюмбариі. Покля што фурт сут іщы місця на теперішнім комунальным теметові, хоц уж перед парома роками бесідувало ся о браку місц до хороніня жытелів Ґорлиц. Рахує ся, што річне запотрібуваня то близко 130 місц на цмонтери. Тоты помалы ся кінчат, хоц выкорыстує ся тіж і старшы гробы.

Модернізация Климківкы

Над климківскым заливом тырват ІІ етап прац повязаных з заґаздуваньом берегів штучного озера. Єст тото можливе завдякы підписаню через ґміну Ропа умовы на тоту ціль. Роботы веде фірма Гажбуд [Hażbud]. Завершыня ІІ етапу єст передвиджене на вересен/септембер 2020 рока. Вартіст проєкту то ок. 1,5 мілийона зл. В рамках ІІ етапу буде побудувана 350-метрова біциґльова стежка. Буде тіж побудуваных 15 компактных пляж, сходы до озера, помосты і місця на затриманя свого водного ґратя. Ціла обшыр буде освітлена. Будут і місця на ґрілюваня, де побудуют специяльны альтаны. Вшыткы обєкты так само достосуют до потреб осіб з дисфунцкиями. Проєкт ґміны Ропа творит цілійст з інчым проєктом реалізуваным при партнерстві з ґорлицкым повітом. Бесіда про будову біциґльовой стежкы з Климківкы до Устя Руского. Загальном цілю проєкту єст збільшыти туристичну атракцийніст штучного озера в Климківці. Партнером ґміны Ропа при реалізациі задачы єст ґміна Устя Рускє.

В Странянах думают на розвиток села

В невеликым русиньскым селі Страняны, котре находит ся на Пряшівскій Руси в любовяньскым окресі, прожыват 190 осіб. І кєд фінансів в селі не є много, старостка села Вєра Кравчакова плянує дальшы грошы здобывати через ріжны проєкты. В тым році Страняны будут напр. реалізувати перехід через дорогы з дотаций Міністерства Внутрішніх Справ Словацкой Респубилкы ци реконстуувати част пути, што іде через село, з фінансів, котры місцевіст здобыла з Уряду Влады СР. Як інформувала старостка Бєра Кравчакова, має она надію, жебы в будучности Страняны были іщы барже змодернізуваны як тепер. Рахує на тото, жебы ся повело выремонтувати вшыткы сельскы дорогы. Заєдно вірит, же і проєкт будуваня мешкань в Странянах буде як раз актуальный, і же до села приде веце молодых люди з дітми, бо з тым є повязане і отворіня сельской основной школы, котру минулого рока Страняны мусіли закрыти.