Сумар дня на 06. жолтня/октобра 2020 р.

Приносиме вам сумар медияльной ґрупы ЛЕМ.фм+ на ден 06. жолтня/октобра 2020 р.

В часі долгого серпньового вікенду в Крампній проходил 6. уж раз Маґурскій Ультрамаратон. Подія од років тішыт ся великом популярністю серед любителів спорту та Низкого Бескіду. Зо взгляду на пандемію і ограничыня не знатя было, ци тогорічна едиция подіі взагалі пройде. На щестя орґанізаторы порадили си з рыхтуваньом маратону і більше як 500 участників, з трьох можливых трас дотерло до меты. То заінспірувало орґанізаторів Ультрамаратону подумати над зимовом едицийом Гірскіх Бігів по Низкым Бескіді. Можливе, же в лютым/фебруарі в часі зимовых вакаций Крампна зас заполнит ся любителями маратону, котры спрібуют своіх сил на зимовых трасах. Плянувана зимова едиция то чысто інчы обставины і інче рыхтуваня. Мороз, холод і сніг на трасі та коротшый ден – тото вшытко спричынят і коротшы дистансы. На тоту хвилю тырвают роботы над гармоноґрамом і трасами зимовой едициі. Неодолга мож сподівати ся більше інформаций, а певно іщы того рока зачнут ся записы.

Што дальше в Санковіз з ґеотермальным верчыньом?

Близко два тыжні тому інформували сме о результатах прац при ґеотермальным верчыню в Санковій. Як вказали досліджыня, до той поры не явила ся горяча вода, а лем чыстый метан. Тепер глубокє на три тисячы метрів верчыня буде зліквідуване. Малґожата Малух, війт ґміны Санкова, надіє ся, же єст то лем хвильове звільніня темпа. Актуальні на верчыня заложена буде головка, котра в будучности дозволит на його хоснуваня. Війт заповідат тіж, же ґміна дале буде глядала дофінансуваня на выкорыстаня верчыня як теплозмінника. Єст то єднак покля што барз далекє будуче. Як повіл Давід Купка, ґеофізик, абсольвент Технічного Університету в Кракові, результат аналіз не чудує. Підкрислил, же на такых глубокостях може вказати ся метан, а жебы мож дальше вертіти, треба ся го позбыти, примірно через выпаліня. Не знатя єднак, кілько ся го там находит і кілько часу занимат такій процес. Не єст то іщы конец заінтересуваня ґеолоґів ґорлицком земльом. Од жолтня/октобра на обшыри ґорлицкого повіту Ґеофізика Торунь веде працы звязаны з догляданьом та розпознаваньом джерел ропы і ґазу. Аналізы проведены будут при помочы сейсмічных досліджынь, котры сут шыроко хоснуваныма та безінвазийныма помірами, веденыма для науковых ціли.

71. стріча Спільной Комісиі Уряду та Нацийональных і Етнічных Меншын

7. жолтня/октобра в Варшаві пройде 71. стріча Спільной Комісиі Уряду та Нацийональных і Етнічных Меншын. Проґрам засіданя поділеный єст на дві части. Перша посвячена буде святкуваню ювілею 15-літя комісиі, о котрым інформували сме уж в нашых новинах. В другій части – мериторичній, бесідуваны будут справы важны для меншын, што прожывают в Польщы, м.ін. представлена буде одповід урядовой страны на документ «Нацийональны і Етнічны Меншыны – найважнійшы проблемы середовиска нацийональных і етнічных меншын». Дискутуваны будут VII рапорт тыкаючый ситуациі меншын і реґіонального языка в Польщы та ситуация меншын і соспільности хоснуючых реґіональный язык в часі пандеміі. Комісия запрезентує і заложыня Проґраму Социяльной і Громадяньской Інтеґрациі Ромів в Польщы на рокы 2021-2030.

Віртуальна прогулька по Музею Лемківской Культуры в Зындрановій 

Одтепер Музей Лемківской Культуры в Зындрановій мож обзерати без выходжыня з хыжы. Як можеме чытати на офіцийным фейсбуковым сайті музею, Товариство для Розвитку Музею Лемківской Культуры в Зындрановій закінчыло проєкт в проґрамі Нацийонального Центру Культуры пн. «Культура в сіти». В його рамках выконано новый інтернетовый сайт музею і віртуальну прогульку по цілій загороді разом зо одвиджаньом постійных выстав.