Сумар дня на 05. жолтня/октобра 2020 р.

В пятницю, 2. жолтня/октобра, прошла стацийонарна сесия рады, а радникы в традицийный спосіб – при помочы карт до голосуваня, голосували над одкликаньом дотеперішнього ведучого Мирослава Вальонґа. В голосуваню взяло участ 22 радників присутных на сесиі. Девятьох было за оставліньом Мирослава Вальонґа на функциі, дванадцетеро за його одкликаньом, єден голос был неважный. На нового ведучого рады ґорлицкого повіту выбрали Вітольда Кохана, бывшого ґорлицкого старосту, бургомайстра Ґорлиц, посла на Сойм, а тіж малопольского воєводу. За выбором Вітольда Кохана было 12 радників, проти было 9, єден голос был неважный.

Од 12. жолтня/октобра в ґорлицкым шпытали буде ведене лічыня зараженых коронавірусом. Для хворых буде зрыхтуваный специяльный окремый одділ в будинку Старого Шпыталя, в місци регабілітацийного одділу. Будут в ним поміщены особы, якы не будут мочы быти в домашній ізоляциі, а тым самым будут потрібувати медичной опікы. Передвиджео 22 місця – 5 для осіб підозріваных о заражыня коронавірусом, 15 для тых з потверженым заражыньом і 2 з інтенсивном терапійом. Одділ містит ся на партері, в окремым будинку, має два осібны, незалежны од інчых одділів выходы. Є то забезпечыньом для решты лічниці, понеже дорогы ся в ниякій спосіб зо собом не крижуют. Потребу збільшыти чысло місц для зараженых коронавірусом сиґналізувал уж перше малопольскій воєвода. Більшіст шпыталів в воєвідстві є зобовязана до подібных діянь. Примірово в шпытали в Лимановій такій одділ зачынят робити уж днес.

Студенты Академіі Аніма Мунді і Містецка Публична Бібліотека в Ґорлицях просят на вернісаж выставы фотоґрафіі пн. “Памят і слезы. Пісня о Лемках”, якій пройде в пятницю, 9. жолтня/октобра, о год. 18.00 в сали Під Совом Містецкой Публичной Бібліотекы в Ґорлицях. Академія Аніма Мунді єст школом артистичной фотоґрафіі, яка веде курсы і варштаты з обшыри цифровой і аналоґовой фотоґрафіі. Выстава презентує 60 фотоґрафій выконаных в циянотипіі – 19-вічній монохроматичній фотоґрафічній техніці. Експозиция мала бы в шыршым контексті мотивувати до рефлексиі не лем над світом Лемків, але і загальні чловечом кондицийом. Выстава буде доступна лем до кінця текучого місяця.

По долгым часі назначеным пандемічном загорозом, Музей Ікон в Варшаві вертат з розшыреном офертом. Окрем одвиджаня постійных выстав, буде мож одтепер в музею і взяти участ в зрыхтуваных специяльно выкладах, семінарах, фільмовых стрічах, вернісажах ци варштатах. Фурт мож ся записувати на артистичны варштаты, якы будут проходити в найблизшых місяцях в музею. Будут то варштаты фотоґрафічны, ікон і церковной музикы. Іщы в тым місяци, 20. жолтня/октобра, о год 18.30 в будинку Музею Ікон буде проходил цикличный науковый Семінар Вколо Новосільского пн. «Ікона і Абстракция». Музейны семінары, якы тыкают выдатного лемківского артисты Юрия Новосільского, все ведены сут вызначныма специялистами, напримір о. Генриком Папроцкым, Віталийом Міхальчуком – директором Музею, єпископом Михалом Янохом або Кристином Черні. Семінарам товарышат выставы творів артисты.