Сумар дня на 04. мая 2020 р.

Приносиме вам сумар медияльной ґрупы ЛЕМ.фм+ на ден 04. мая 2020 р.

Повселюдне списуваня в ЗША

В Зъєднаных Штатах Америкы од 1. квітня/апріля проходит повселюдне списуваня населіня. Рахує оно популяцию ЗША і іх пятьох територий. Отриманый формуляр треба выполнити онляйн, через телефон, або послати почтом. Припоминаме о апели Карпаторусиньского Общества, якє просит записувати свою етнічну приналежніст як Carpatho-Rusyn. Є то єдиный спосіб, жебы напевно быти зачысленым до Карпаторусинів. Кєд дахто запише ся як Slavic, Lemko, Carpatho-Russian або Ruthenian, неє ґарантиі, же буде зачысленый до Карпаторусинів. Высше як в посліднім списуваню чысло Карпаторусинів збільшыт шансы доступу до фондів і проґрамів, якы можут підтримувати нашу культуру в Зъєднаных Штатах Америкы.

Чудо в православным монастырі в Супрашли

Ікона Богородиці «Жывоносне Джерело», яка находит ся в монастырі в Супрашли зачала выдавати мирру. В предден свята іконы під одкрытом кошельком вказала ся ікона цілістю покрыта чудным олійком. Перше не обсервувано мирры на тій іконі. Намістник монастыря владыка супрашльскій Андрий бесідує о тым як о особливым благословліню в тяжкым часі епідеміі. Ікона «Жывоносне Джерело» не была наштоден доступна для вірных. Выношено ю все протягом процесиі, в часі коли тырвала епідемія і хвороты. Як голосит сама єй назва, то ікона, яка несе жытя, лічыт духа і тіло. Вірны можут поклонити ся іконі, што находит ся в середині супрашльской монастырской церкви.

Тяжка ситуация гірскых колиб

Ситуация гірскых колиб в часах заморожыня економікы єст барз тяжка. Два місяці были они порожні, а жебы перетримати трудный час, властителі мусіли докладати до інтересу, вылучати огріваня ци занимати ся продаваньом з довозом. То результат стриманя іх діяльности на близко два місяці. Ситуация єст о тілько тяжка, што більшіст такых осередків зараблят на цілорічне фунґуваня ярю і літом. Власти заповідали поміч, єднак в практиці не трафила она до гірскых колиб. Од днес, значыт 4. мая, готелі і нічліговы місця можут зас быти одкрыты. Мусят єднак дотримувати вельох ограничынь звязаных з епідемійолоґічном безпеком. Коливы не мали можливости заробити в часі майового долгого вікенду, коли то переважно принимано вельох туристів. Штобы хоц мінімальні одробити страты, властителі колибы в Сошові одкрыли на портали zrzutka.pl продаж віртуального кіста з ябками. За вплату достає ся талон, котрый буде мож пак вымінити на правдиве кісто. До 30. квітня/апріля з віртуального кіста повело ся зобрати 18 тис. зл. То квота, яка дозволит на максимально місячне фунґуваня колибы. Акция тырвала буде до кінця мая.

Будуют пішо-роверовы пути в Ґорлицях

Зачали роботы звязаны з реалізацийом другого етапу будовы пішо-роверовых пути, на якы місто Ґорлиці достало близко мілийон зл дофінансуваня з середків Европейской Уніі з Реґіонального Операцийного Проґраму Малопольского Воєвідства на рокы 2014-2020. Проєкт під наголовком «Розбудова і модернізация пішо-роверовых пути разом з товаришучом інфраструктуром на обшыри міста Ґорлиці як елемент збільшаючый туристичну атракцийніст сандецкого Субреґіону» обнимат будову двох пішо-біциґльовых пути разом з ознакуваньом і місцями одпочываня на одтинках А-Б – улицях Баторого і Кохановского, та Ц-Д – улицях Бічской, Солідарности, Міхалюса, Шопена.