Сумар дня на 3. листопада/новембра 2020 р.

Приносиме вам сумар медияльной ґрупы ЛЕМ.фм+ на ден 03. листопада/новембра 2020 р.

На Словацию лем з неґативным тестом на COVID-19

Од 2. листопада/новембра візд з Польщы на Словацию та аж і транзит з Польщы через територию Словациі можливый єст лем з засвідчыньом неґативного тесту RT-PCR на COVID-19. Єст то дальшый етап в борбі проти пошырюваню ся епідеміі коронавіруса на Словациі. Од суботы, 31. жолтня/октобра, тырват тестуваня вшыткых жытелів Словациі, за вынятком діти ниже 10 рока жытя. Уряд на тоту хвилю не плянує вводити постійных контроли на граничных переходах. Наказ обовязкового засвідчыня о негативным тесті на COVID-19 тыкат ся жытелів, котры протягом остатніх 14 дни были не лем на обшыри Польщы, але тіж іншых держав, котры были вызнаны за безпечны під взглядом епідемічного загорожыня. В припадку подорожы через словацку територию до Польщы з Хорвациі, Чешской Республикы,Чорногоры, Украіны ци Сербіі і іншых держав вызнаных за небезпечны під взглядом епідемічного загорожыня дозволеный єст транзит протягом 8 годин од моменту візду на обшыр Словациі. В тым часі не вільно ся затримувати з вынятком танкуваня. Брак бадань і інчы нарушыня обовязуючых переписів караны будут мандатами, котры можут вынести аж і до 1700 евро.

В Креници буде новый шпыталь для хворых на COVID-19

Власти малопольского воєвідства підняли рішыня створити в Креници шпыталь ІІ ступени для хворых на COVID-19. На тоту ціль презначены будут поміщыня 20. Войскового Курортно-Регабілітацийного Шпыталя. За зрыхтуваня та одкрытя єдиниці одповідат спілка TAURON. В шпытали зрыхтуваных буде 200 місц. Разом зо шпытальом, в санаториі Continental утворена буде тіж нова ізолятория, котра помістит 150 хворых. Надзір так над шпытальом, як і ізоляторийом буде мал повітовый шпыталь в Креници з директором Славоміром Кмаком. Найбільшы проблемы звязаны сут з можливым браком медичного персонелю, особливо медичных сестер. Шпыталь і ізолятория повинны зачати свою діяльніст в половині листопада/новембра. Свою діяльніст зачал уж новый ковідовый одділ в Ґорлицях. На тоту ціль посвячены были одділ регабілітациі, част психіятриі і інтерністично-ендокринолоґічный та інтерністично-кардийолоґічный. Разом єст більше як 100 місц. А о два тыжні, кєд вшытко піде згідні з думком директора ґорлицкого шпыталя Марияна Свєжа, вшыткы тесты на присутніст COVID-19 ведены будут в ґорлицкым шпытали. Буде то можливе завдякы двом новым лябораториям.

Ґазифікация ґміны Устя Рускє

Війт Ґміны Устя Рускє інформує, же Польска Спілка Ґазовництва Одділ Гірничый Заклад в Кракові зачал працувати над концепцийом ґазифікациі части ґміны Устя Рускє. Проєктом обняты были села Ґладышів, Ждыня, Конечна, Смерековец, Реґєтів, Шквіртне, Квятонь, Устя Рускє, Ганчова і Высова. Заінтересуваны жытелі ґміны прошены сут выполнити специяльні зрыхтувану анкєту, яку мож побрати з сайту ґміны, або одобрати од шолтысів ци в Уряді Ґміны. Выполнены формулярі треба достарчыти до Уряду Ґміны в терміні до 30. листопада/новембра.

Вeртаючый проблем з медведями в полудньовій страні Татр

До зимы уж ближе як дале, a для звірят западаючых в зимовой сон єст то послідній час на згромаджыня одповідніх запасів. Одчули тото жытелі сел, находячых ся по полудньовій страні Татр, де зас зачынают підходити медведі. В часі гляданя остатніх запасів перед зимовым сном медведі підходят небезпечні близко люди, головно на обшыри міста Высокы Татры. Тема медведів і іх жеруваня осіню вертат каждого рока. Аж і пробы забезпечыня контенерів, до котрых найчастійше приходят звірята, не принесли результатів і фурт підходят они під хыжы. З той причыны рішено дослідити тых, котры підходят так близко люди. Цілю досліджыня єст провірити, ци такій особник втратил своі натуральны одрухы і тырвало звязал ся з чловеком.