Сумар дня на 1. лютого/фебруара 2021 р.

Приносиме вам сумар медияльной ґрупы ЛЕМ.фм+ на ден 01. лютого/фебруара 2021 р.

Омбудсман припомнул про права Шлезаків і Вілямовян

Польскій омбудсман Адам Боднар звернул увагу премєрови Матеушови Моравєцкому, же Конституция дає польскым громадянам, якы належат до нацийональных і етнічных меншын, право до захованя і розвитку свого языка, звыків, традиций, як і культуры. Єднак, як підкрислил омбудсман, респектуваню прав Шлезаків і Вілямовян вадит конструкция самого закону о нацийональных і етнічных меншынах та реґіональным языку. Закон вычыслят особливости, якы мусит сполняти меншынова ґрупа, але не обнимат Шлезаків і Вілямовян, якы іх сполняют. Боднар припомнул, же Шлезакы і Вілямовяне хоснуют своі языкы, а іх предкы од поколінь заселяют актуальну територию ПР. Мают они почутя окремой культуровой достоменности і вказуют волю єй захованя, а мимо того не хоснуют правных ґарантий передвидженых для нацийональных і етнічных меншын, ци ґруп хоснуючых реґіональный язык. Статус нацийональных меншын мают в Польщы: Литовці, Украінці, Білорусины, Росияне, Німці, Жыды, Чехы, Ормяне і Словакы. Статус етнічных меншын мают: Татары, Ромы, Караімы і Лемкы. Кашебскій язык має статус реґіонального языка.

ХХІІІ сесия Рады Ґорлицкого Повіту

В четвер, 28. січня/януара, прошла XXIIІ сесия Рады Ґорлицкого Повіту. Єдным з гости беручых участ в сесиі был Томаш Міхаловскій, шеф Політичного Ґабінету Віцепремєра Ярослава Ґовіна. Вчас свого выступліня передал він інформацию, што серед бенефінциєнтів проґраму підпоры для гірскых ґмін нашли ся ґміны з обшыри ґорлицкого повіту: Устя Рускє, Санкова, Ропа, Лужна, Липинкы, ґміна Ґорлиці і Місто Ґорлиці. Середкы можут быти схоснуваны на туристичны і комунальны інвестициі: м.ін. туристичны пути, паркы, видоковы пункты, паркінґы, скансены, музеі, дорогы, тротуары і канализацию. Поінформувал, же высокіст підпоры буде залежна од выдатків, якы дана ґміна понесла на інвестициі в роках 2016-2020. Передал і інформациі для війтів і бургомайстрів з терену Ґорлицкого Повіту, тыкаючы закону «локаль за ґрунт», якій входит в склад рынковой части мешканьового пакєту. Закон має заохотити самоуряды шырше анґажувати ся в активности для розвитку будівництва, хоснуючы склад ґмінных нерухомости. Інвесторы будут мочы придбати нерухомости од ґмін з частичным розрахуваньом іх ціны мешканями або інчыма локалями, якы можут служыти самоурядовым спільнотам. Закон был підписаный президентом. Вчас стрічы Томаш Міхаловскій задеклярувал свою поміч вшыткым самоурядам за посередництвом старосты Мариі Ґубалы.

Одповід віцеміністра на бунт підприємців

Недавно інформували сме о властителях бізнесів, якы мали уж дост ограничынь выкликаных пандемійом коронавіруса, і рішыли зас одкрыти свою діяльніст. В тій справі выповіл ся вчас посіджыня Спільной Комісиі Уряду і Самоуряду віцеміністер Внутрішніх Справ і Адміністрациі Мацєй Вонсік. Подля його слів локалі «повинны быти закрыты, во вшыткых была поліция і санепід, але суровіст кары єст за низка до корысти, якы мают властителі з одкрытя тых місц». Віцеміністер додал, же до бунтуючых ся бізнесів будут высланы «вшыткы державны службы, на челі з санепідом і поліцийом». Клюбы і дискотекы мали бы мати одобрану концесию на продаж алькоголю, што бы мало подля віцеміністра Мацєя Вонсіка «довести до зменшыня оплачальности ведіня того типу бізнесу в часі пандеміі».

Креницкы Гірскы Бігы

Бургомайстер Крениці Пьотр Рыба поінформувал о підписаню умовы на орґанізацию новой цикличной подіі «Креницкы Гірскы Бігы». Подія має проходити в тым році в днях 28.-30. мая. Орґанізаторы зрыхтували дакілько трас о долгости од 10 до 105 км. Пути будут вести верхами Сандецкого Бескіду – м.ін. через Яворину і Лабівску Поляну, та Низкого Бескіду – через Ділец (Dzielec) і Лацкову, а тіж через Тылич і Мохначку. Додатковом атракцийом на трьох трасах будут бігы на верх креницкой Видоковой Вежы.