Сумар дня 9. квітня/апріля 2024 р.

Приносиме вам сумар медияльной ґрупы ЛЕМ.фм+ на ден 9. квітня/апріля 2024 р.

«Карпатскы Локальны Ініциятивы»

Стоваришыня «Pro Carpathia» оголосило конкурс на карпатскы ініциятивы в рамках задачы «Карпатскы Локальны Ініциятивы» фінансуваной Нацийональным Інститутом Свободы – Центром Розвитку Громадяньского Соспільства. Цілю конкурсу єст збільшаня заанґажуваня молодых орґанізаций і неформальных ґруп в публичне жытя, через реализацию проєктів звязаных з культуровом спадковином і природом карпатскых реґіонів – шлезского, малопольского і підкарпатского воєвідств. Форма реализуваной ініцятивы може быти ріжна: од варштатів, едукацийных занять, прелекций по спільны діяня для природы. О дофінансуваня можут ся старати проєкты, котры окрем мікродотациі зо Стоваришыня «Pro Carpathia» будут спераны што найменше через іщы єдну орґанізацию. Преміюваны будут тоты проєкты, котры берут до увагы при реализациі задач спілпрацу з локальныма саморядами ци публичныма інституциями. Додатковы пункты будут тіж признаваны проєктам тыкаючым промуваню Шляку Волошской Культуры. На фінансову підпору стоваришыня перезначыло 200 тис. зл. Максимальна квота, котру мож буде отримати, то 10 тис. зл, а мінімальна 3 тис. зл. Внескы мож зголошувати до 30. квітня/апріля. Дрібниці і реґулямін конкурсу находят ся на офіцийным сайті Стоваришыня.

Рыхтуют ся зміны на дороґах в ґорлицкым повіті

Повіт Ґорлиці разом зо Стоваришыньом Ґорлицка Функцийональна Обшыр, в склад котрой входят місто Ґорлиці та ґміна Ґорлиці і ґміна Санкова, підписали спілпрацу на реализацию задач з обшыри поправы безпекы на дорогах. 4. квітня/апріля представникы власти стрітили ся на підписаню документів, котры уможливляют спільне стараня ся о дофінансуваня на квоту понад 6 млн евро з Европейского Фонду для Малопольщы на рокы 2021-2027, перезначеного на реализацию задач звязаных з поправом безпекы на дорогах та ограничыньом низкой емісиі хоснувателів повітовых доріг.  В рамках спілпрацы каждый з партнерів зобовязаный єст до реализациі єдной з задач, будут то перебудова скрижуваня в центрі Ґорлиц та быудова пішо-роверовых стежок при повітовых дорогах на обшыри міста і ґміны Ґорлиці і в ґміні Санкова.

Зас мож буде обізріти спектакль «Бомбель»

Стоваришыня ім. Мирка Нагача «Білый сокіл» та Меджепоколіньова Tеатральна Ґрупа Племя просят на Театральный Майовый Вікенд. Уж тепер інформуєме, што каждый, хто іщы не виділ спектаклю «Бомбель», зрыхтуваного на основі оповіданя Мирка Нагача, буде мал таку нагоду в майовый вікенд. Як і перше, сценом для акторів з ґрупы Племя буде колиба на обшыри Лемківской Ватры в Ждыни. Спектакль буде презентуваный 2., 3. і 4. мая. о 21.00 год. Вступне дармо. Припоминаме, што «Бомбель» перезначеный єст лем для дорослых обзерачів.

Альтернативны лекциі фізичного выхованя в Польковицях

Ученикы з польковицкых ґмінных шкіл взяли участ в альтернативных лекциях фізичного выхованя. Занятя орґанізуваны сут Фундацийом Монікы Пырек «Kinder Joy of moving. Alternatywne lekcje WF». Цілю такых варштатів єст заохочаня діти і молодежы до заниманя ся спортом через нетипове вказаня спортовых дисциплин. Ініциятором орґанізациі занять в Польковицях был уряд ґміны при спілпрацы з основныма школами. Через яр фундация проведе альтернативны занятя іщы в пятьох інчых місцях.

«Никыфор. Маляр над маларями»

Директор Музею Курпівской Культуры в Остроленці та Директор Нацийонального Етноґрафічного Музею в Варшаві просят на одкрытя выставы «Никыфор. Маляр над маларями». Експозиция складат ся з 106 прац креницкого артисты, котры находят ся в збірці Етноґрафічного Музею в Варшаві. Вернісаж выставы пройде 10. квітня/апріля о 14.00 год., а выставу мож буде обзерати до 16. червця/юнія тр.