Сумар дня 7. мая 2024 р.

Приносиме вам сумар медияльной ґрупы ЛЕМ.фм+ на ден 7. мая 2024 р.

20 років обновліня Общества св. Йоана Крестителя

В суботу 4 мая в грекокатолицкым катедральным соборі св. Йоана Крестителя Общество св. Йоана Крестителя святкувало 20 років од свого обновліня. Серед присутных были і представникы русиньскых інституций і орґанізаций. Святкуваня зачало ся од привитаня вшыткых отцьом Міляном Ясиком. Пак была торжественна божеска літургія св. Йоана Златоустого, котрой головным служытельом был Высокопреосвященный Йона. Літургія ведена была в церковнославяньскым языку з русиньскыма частями. По службі божій голос забрали запрошены гості, котры підкрисляли великы роботу Общества св. Йоана Крестителя про русиньскых грекокатоликів. Святкуваня продолжало в просторах Архієпископского уряду, де отці Ясик і Поповець передали памятковы плакєткы за поміч і підпору Общества. Офіцийна час закінчыла ся благословліньом Преосвященного Йоны. Бильше на тоту тему чытайте на нашым портали.

«Драпіжне погранича» спільна праца на річ великых драпіжників

Державны Лісы прулучыли ся до трансграничного проґраму «Драпіжне погранича». Проєкт має на ціли зінтеґрувану охорону великых драпіжників прожываючых на териториі Польщы і Словациі. Основом проєкту єст зміцнити трансграничну спілпрацу в заряджаню популяцийом медведів, волків і рысів. В першым етапі обі страны мают провести анализу даных о чыслі і розміщыню тых трьох ґатунків. То буде основом до опрацуваня рекомендаций для моніторуваня звірят. Ефектом той части буде введіня єдной методолоґіі збераня і громаджыня даных. Пак проведеный буде моніторінґ і будуваня інформатичного систему з центральном базом даных. Досліджыня дополнит едукацийна част на тему охороны ґатунків обнятых проєктом. Головным партнером єст Центр Координациі Середовисковых Проєктів, членами проєкту сут головно приграничны Надлісництва, Реґіональна Дирекция Державных Лісів в Кракові і пят Нацийональных Парків з Малопольщы.

Ансамбль Ластівочка отримал дофінансуваня з проґраму ЕтноПольща 2024

Початком мая оголосили результаты проґраму ЕтноПольща орґанізуваного Нацийональным Центром Культуры. Реализуваный він єст од 2018 р., а його цілю єст підтримувати локальны і культуровы достоменности та творити можливости до участи в культуральным жытю так на селі, як і в місті. До тогорічной едициі проґраму зголошено  понад 1800 внесків. Серед выріжненых нашли ся тіж внескы промуючы лемківску культуру або реализуваны на Лемковині, м.ін. Центра Культуры в Креници на реализацию задачы «Там в горах Карпатах, там Лемко іде». Дофінансуваня отримало тіж Стоваришыня Лемків на закуп народного облечыня та дополніня знищеных елементів кроів для Лемківского Ансамблю Пісні і Танця «Ластівочка». Карпатскє Товариство буде реализувало Етноварштаты в Лопянці, а Містецко-Ґмінна Бібліотека в Польковицях проєкт «ЕтноКультура? Бер участ».

В Польковицях думают про овады

В Польковицях при Основній Школі нр. 1 станули хыжкы для овадів. Новый еколоґічный проєкт реализуваный был в рамках родинного біолоґічно-технічного конкурсу, котрого цілю было звернути увагу на масове вымераня овадів, особливо тых запиляючых. До конкурсу зголошено аж 29 готовых конструкций, котры по закінчыню оціняня станули в дощовій загороді школы. Як підркислила директорка школы, має она тіж вертикальну загорідку та таку з квітьом і яринами, де ученикы самы занимают ся тым, што там росне – што вчыт іх одповідальности за середовиско.