Сумар дня 7. марця 2023 р.

Приносиме вам сумар медияльной ґрупы ЛЕМ.фм+ на ден 7. марця 2023 р.

Єст уж доступна нова туристична атракция в Низкым Бескіді

Видокова вежа в Дошници єст одкрыта для одвиджаючых од кінця лютого/фебруара. Нова атракция находит ся близко середвічного городиска «Валік» і має 25 м высокости. Як підкрисляют власти ґміны Новый Змигород, неодолга зачнут ся працы звязаны з будовом доіздовой дорогы до вежы і завершат тоты порядковы, ведены при новій атракциі. Остатнім етапом буде опрацуваня туристичной пути, котра поведе приізджаючых до ґміны по найцікавшых місцях реґіону. Быти може поведе ся тіж урухомити специяльну аплікацию на телефон, в котрій найде ся нова мапа. Ґміна зреализувала задачу завдякы дофінансуваню з Урядового Фундушу Локальных Інвестиций – набір для «Гірскых ґмін». Кошт реализациі то близко 930 тис. зл.

«Малопольскє Село 2022»

Уж семый раз Малопольскє Воєвідство зорґанізувало конкурс шолтыств «Малопольскє Село 2022». Головном цілю єст выріжнити села і іх жытелів, што активні діют в обшыри збільшаня атракцийности малопольского села. Конкурс поділеный єст на три катеґориі: Найкрасше Малопольскє Село, Новаторскє Малопольскє Село і Малопольскє Село в Сіти. Участниками конкурсу можут быти шолтыства зголошены ґмінами з обшыри малопольского воєвідства, при чым кажда ґміна може зголосити лем єдно шолтыство в єдній або в двох катеґориях. Цілковита высокіст фінансовой підпоры для тогорічных лавреатів конкурсу то 480 тис. зл. Ґміны можут складати своі внескы до 22. марця тр. Фінансовы нагороды будут признаваны в формі дотациі для ґміны з презначыньом на реализацию задач в выграным шолтыстві. Выбраны задачы мусят служыти збільшыню атракцийности села або поправі жытя його мешканців. Вымаганы формулярі і внескы находят ся на сайті Малопольского Воєвідства.

Конкурсі на великоднє яйце з ґорлицкого повіту

Ґорлицкій Центр Культуры просит до участи в плястичным конкурсі на обрядове великоднє яйце. Направленый він єст головні на учеників основных і середніх шкіл і дорослых з обшыри ґорлицкого повіту. Конкурс пройде в пятьох катеґориях: для учеників кляс од 1 до 3, од 4 до 6 і од 7 до 8 основной школы, єдна катеґория для молодежы з середніх шкіл і єдна для дорослых. Цілю конкурсу єст підтримуваня локальных традиций і народной творчости. Зголошуваны писанкы мусят быти зрыхтуваны традицийном методом, а прикрасы мают навязувати до традицийных для жытелів ґорлицкого повіту взорів. Працы мож зголошувати в днях од 15. до 17. марця в плястично-керамічній працовни ҐЦК. Реґулямін і вшыткы потрібны документы находят ся на сайті ҐЦК.

«Капличкы Малопольщы»

Припоминаме, што іщы лем до 10. марця мож складати внескы в черговій едициі конкурсу «Капличкы Малопольщы». Єст він направленый на єдиниці територияльного самоуряду з малопольского воєвідства, котры піднимают консерваторскы, реставраторскы або будівляны працы при памятковых капличках находячых ся в Малопольщы. В тым році Самоурад Малопольского Воєвідства передаст на тоту ціль 700 тис. злотых. Цілю конкурсу єст захованя для будучых поколінь вартістных обєктів, будучых важным елементом культуровой дідовизны Малопольщы. Обєкты не мусят быти в воєвідскым ци ґмінным списку забытків, повинны лем мати артистичну і історичну вартіст. Максимальна квота дофінансуваня то 40 тис. злотых і не веце як 60% коштів реализациі цілости прац. В минулых едициях конкурсу повело ся одновити більше як 620 обєктів, за суму понад 5,5 млн злотых.