Сумар дня 5. квітня/апріля 2023 р.

Приносиме вам сумар медияльной ґрупы ЛЕМ.фм+ на ден 5. квітня/апріля 2023 р.

Хто знат русиньскій язык?

Як інформує аґентура Рутенпрес, в минулу суботу 1. квітня/апріля в просторах Основной Школы Братство Єдинство в Коцурі (в Сербіі) прошли 13. Меджеокруговы Змаганя з Русиньского Языка і Языковой Культуры. Подія одбыла ся в рамках 260. річниці населіня Русинів до Коцура, 110. річниці першого театрального представліня в Коцурі та 110. річниці народжыня проф. Гавриіла Надя. В змаганях участ взяло 51 школярів з кляс од пятой до осмой, з ріжных сел і міст, де жыє русиньскє населіня, м.ін. з Руского Керестура, Дюрдьова, Нового Орахова ци Шыду. Аж 35 участників змагань скінчыло на першых трьох місцях. Нагороды вручала м.ін. представничка Одділіня про Освіту Нацийонального Совіту Русинів Олена Папуґа. Змаганя орґанізувало Міністерство Освіты, Наукы і Технолоґічного Розвитку Республикы Сербіі, Дружство про Русиньскій Язык і Літературу та Основна Школа Братство Єдинство в Коцурі.

Поглубляют спілпрацу медже приграничном Словацийом і Украіном

В минулым тыжни проходило білятеральне єднаня медже Пряшівскым Самосправным Крайом і Закарпатском Областю Украіны. Зо словацкой страны присутны были Штефан Бієляк і Йозеф Канущак, з украіньской – Володимір Чубрик, голова Закарпатской Области. Обі адміністрацийны єдиниці хотят зінтенсивнити спілпрацу на словацко-украіньскым приграничы, особливо з контексті старань Украіны до вступліня до Европейского Союзу – украіньска страна хоче схоснувати досвідчыня ПСК в обшыри змін, якы мусіли пройти в пути до інтеґрациі з унійом. На стрічы бесідували м.ін. о можливостях кооперациі в рамках черезграничных проєктів цілю розвитку приграничных територий, практичні в каждій обшыри – освіты, інфраструктуры, социяльных служб, туристикы ітд. Результатом білятерального єднаня ПСК і Закарпатской Областной Рады буде і офіцияльна деклярация партнерства в рамках Договору о Спілпрацы, котрый обидві стороны мали бы підписати в найблизшых місяцях.

Русин новым шефом Крайской Орґанізациі Туристичного Руху Северовыход Словациі

Як інформувала Барбора Чехова з Крайской Орґанізациі Туристичного Руху Северовыход Словациі, 30. марця одбыло ся вальне зобраня орґанізациі, котрой зряджувательом є Пряшівскій Самосправный Край. Выбрали нового председу, котрый вычерял Михала Сікору. З початком квітня/апріля шефом Крайской Орґанізациі Туристичного Руху Северовыход Словациі остал Михал Ільканин, досвідченый політик і урядник, котрый скорше долгы рокы был членом драматичного ансамблю Театру Александра Духновича в Пряшові, модерувал ріжны русиньскы подіі, грал в фільмах. Ільканин повіл, што є змотивуваный, жебы продолжати розвиток туристичного руху, котрый через 10 років успішні реализувал його попередник. Присутный на зорбаню жупан ПСК Мілян Маєрскій накрислил візию дальшого розвитку – а то підпора авіятранспорту, жебы іщы барже одкрыти ся на заграничных туристів, звекшыти чысло візит і доступніст обшыри. Пряшівскій Край є третім найпопулярнішйым, кєд іде о чысло туристів, крайом Словациі.

«Лемківскы смакы» – обовязкова позиция на кухарску поличку

Кухарска книжка «Лемківскы смакы» зас є доступна в інтернетовій і стацийонарній продажы. Першый тираж розышол ся протягом парох тыжнів од вказаня ся публикациі. В звязку з великым заінтересуваньом книжком конечна была реализация додруку, што ся повело, зато каждый, хто бы хотіл посмакувати кухню з часів передвыселенчой Лемковины, може тото зробити. В книжці находят ся рецептуры на вшыткы основны стравы, якы были штоденністю на лемківскых столах. Была то проста кухня, базуюча на парох складниках, присутных в каждій ґаздівці. Книжка дає не лем практичный хосен в виді конкретных рецептур, але і реконструує нам спосіб іджыня нашого соспільства. в мож придбати в склепі на сайті lem.fm або особисто в Рускій Бурсі в Ґорлицях.