Сумар дня 4. квітня/апріля 2024 р.

Приносиме вам сумар медияльной ґрупы ЛЕМ.фм+ на ден 4. квітня/апріля 2024 р.

«Отцюзнина» має уж свій сайт

Літом 2023 р. подарило ся з фінансовом підпором американьскых Русинів через проф. Павла Роберта Маґочія обновити выдаваня єдиного друкуваного русиньского періодика на Підкарпатскій Руси – «Отцюзнины». Выдавцям, котрыма сут Закарпатскє Областне Науково-Культуролоґічне Общество ім. Александра Духновича і Русиньскій Культуролоґічный Клюб, подарило ся в минулым році публикувати два чысла журнала. Од першого выданя зліпшувала ся каждым дальшым ґрафічна обробка, але і обсяг «Отцюзнины». На просьбу американьскых Русинів, котры підтримали выдаваня публикациі на два рокы, буде одтепер она доступна і в електронічній формі в Інтернеті. Дочасным притулком стал про «Отцюзнину» і наш сайт www.lem.fm. Одтепер журнал має свій новый вебсайт (www.otcuznyna.com), на котрым мож найти выбраны статі з друкованой версиі, а недавно прибыла там і нова електронічна версия выданя, котру мож чытати.

Самоурядовы выборы

Уж в найблизшу неділю, 7. квітня/апріля в цілый Польщы одбудт ся самоурядовы выборы. Заохочуєме взяти участ в выборах, бо як знатя – без нашого голосу выберут за нас інчы. Серед кандидатів є вельо Лемків, якы активно влучают ся в жытя соспільности, в котрых жыют. Так є і на Лемковині, і на західніх землях. Приміром, кандидатом на бургомайстра Дуклі є Богдан Ґоч, лемківскій діяч і ведучый Музею Лемківской Культуры в Зындрановій. Поєдны лемківскы кандидаты (або особы заанґажуваны в діляньст для лемківской меншыны) стартуют на посады радників в ґмінах, повітах ци воєвідствах. Є іх досправы вельо, зато не сме в силі прикликати вшыткых, але выміниме хоц-бы пару назвиск: Анна Горощак – стартує до Містецкой Рады в Хоцянові, Павел Сокіл – до Рады Ґорлицкого Повіту, ци наша редакцийна камаратка Моніка Тылявска – до Рады Ґміны Липинкы. Заохочуєме сперати своіх!

Парохіі на Словациі можут старати ся о фінансову підпору

Пряшівска Грекокатолицка Архієпархія выголосила 22. марця апель о передкладаня прошынь о поміч по землетрясіню, котре обняло східню Словацию 9. жолтня/октобра минулого рока. О поміч можут ся старати парохіі Пряшівской Архієпархіі, в котрій было пошкодженых 52 обєктів, з того 45 храмів. Парохіі можут загнати своіх просьбы о фінансову поміч до 16. квітня/апріля, а можут внескувати о ремонт храмів і приходств. Як подал Інформацийный Центр Пряшівской Архієпаріі, дотация може быти схоснувана і на уж зреализуваны роботы, кєд же період реализациі є од 1. листопада/новембра 2023 р. до 30. серпня/ авґуста тр.

Польковицка Поліция рекрутує кандидатів

Місто Польковиці інформує, шот тырват рекрутация до Поліциі. Якы кваліфікациі треба мати, жебы вступити до Поліциі? О тым буде мож побесідувати з робітниками Кадр і Школіня Поліциі в Польковицях в поєдных вызначеных термінах. Найблисшы даты принятя кандидатів на обшыри Нижнього Шлеска то 24. квітня/апріля, 8. липця/юлия, 30. жолтня/октобра і 30. грудня/децембра. Детальны інформациі о ректутациі найти мож на вебсайті Повітовой Коменды Поліциі в Польковицях.