Сумар дня 30. квітня/апріля 2024 р

Приносиме вам сумар медияльной ґрупы ЛЕМ.фм+ на ден 30. квітня/апріля 2024 р.

Др габ. Павел Малецкій нагородженый на Ґалі Поважной Музикы Fryderyk Festiwal 2024

В неділю 28. квітня/апріля в сідибі Нацийональной Симфонічной Оркєстры Польского Радия в Катовицях проходила 30. ювілейна торжественна Ґаля Поважной Музикы Fryderyk Festiwal 2024. Вчас ґалі вручаны были найважнійшы нагороды музичного промыслу в обшыри клясичной музикы. Каждого рока присыланы сут соткы зголошынь до той престіжной нагороды. Приємно нам заявити, што др габ. Павел Малецкій, наш редакцийный колеґа і спілоснователь ЛЕМ.фм, одберал нагороду як режысер звуку за Альбум Рока в катеґориі Вокальна Камеральна Музика. Фоноґрафічна Академія найвысше оцінила альбум пн. «Владислав Желеньскій. Вшыткы пісні», на котрым парунадцетьох співаків награло пісні выдатного композитора зламу ХІХ і ХХ ст., што причысляны сут до найціннійшых примірів продолжыня співочой творчости Фридерика Шопена і Станіслава Монюшкы. Серед вокалистів платні є і Лукаш Гайдученя, выдатный баритон, бадач та дириґент хору Катапетасма. Сердечні ґратулюєме!

Малопольскы Капличкы 2024

Сут уж результаты конкурсу Малопольскы Капличкы 2024. Конкурс был направленый на єдиниці територияльного самоуряду в малопольскым воєвідстві, якы піднимают консерваторскы, реставраторскы або будівляны працы при памятковых капличках находячых ся на обшыри малопольского воєвідства. Цілю конкурсу єст сохранити для будучых поколінь вартістны обєкты, што сут важным елементом культуровой спадковины Малопольщы. Того рока в рамках конкурсу територияльны єдниці одновлят 65 обєкты. Серед выбраных нашла ся тіж капличка з Лемковины, яка ся находит в ґміні Устя Рускє в селі Ізбы. До той поры повело ся привернути давный блеск більше як 700 обєктам.

«Сліды»- жытя на Лемковині в істориях і знимках

«Сліды. Лемковина в реляциі жытелів» то нова публикация выдавництва Libra авторства Кжыштофа Пєжґальского. Книжка рахує понад 100 стран історий, а ціліст дополнюют чорно-білы знимкы місц і жытелів авторства фотоґрафа Кжыштофа Пєжґальского. То спомины м.ін. Петра Мурянкы, Стефаніі Гладик ци Миколая Ґалчыка, котры оповідают не лем про выселіня, але тіж повороты і жытя на Лемковині. Як підкрислил автор во вступі публикациі, єст то вертаня до джерела, мікросвіта, котрый дале утримує свою достоменніст і окреміст. Пєжґальскій переказує тот світ дале для знаня, артистичных вражынь, але особливо для памяти. Альбум мож купити на страні выдавництва Libra.

«Лемківскы співанкы зо Святковы Великой» нова публикация Василя Баволяка

То не конец новых публикаций. Накладом Выдавництва Жызновскій вказала ся нова книжка Василя Баволяка «Лемківскы співанкы зо Святковы Великой. Співник». Публикация має  понад 250 співанок записаных по лемківскы кірлицьом, в транскрипциі і в тлумачыню по польскы. Додатково кажда співанка має нутовый запис, а ціліст прикрашают ілюстрациі Кжыштофа Радошка. Припоминаме, што єст то уж третя публикация Баволяка присвячена лемківскій культурі захованій в селі Святкова Велика. Передні дві книжкы тыкали лемківского весіля і приповідок і приказок. Співник мож уж купити на страні Выдавництва, але його офіцийна премєра пройде 25-26 мая в часі Кєрмешу в Вільхівци.

Майовы атракциі для жытелів Польковиц

Як інформує польковицкій Центр Культуры, 4. мая з нагоды тзв. маівкы в Брацкым Парку одбуде ся шор подій, серед котрых каждый жытель Польковиц выбере дашто для себе. То м.ін. ґалерия штукы в пленері, гры і забавы для наймолодшых, але тіж і інчы атракциі. Од 16.00 год. участникы акциі будут мочы послухати музику в зоні chillout. Ґміна Польковиці просит вшыткых, котры на тзв. долгій майовый вікенд не выізджают поза місто, жебы брати активну уьаст в спільній забаві.