Сумар дня 3. марця 2023 р.

Приносиме вам сумар медияльной ґрупы ЛЕМ.фм+ на ден 3. марця 2023 р.

Стріча нацийональных совітів з міністром просвіты в Сербіі

За аґентуром Рутенпрес, вчера в Бельграді одбыла ся стріча представників нацийональных совітів з міністром просвіты Бранком Ружічом. Нацийональный совіт Русинів репрезентувала Олена Папуґа. До участи в стрічы закликал вшыткы нацийональны совіты міністер Ружіч. Темом бесіды было продолжаня і зліпшыня істнуючых механізмів спілпрацы медже Міністерством просвіты Республикы Сербіі і нацийональных совітів нацийональных меншын.

Вмер русиньскій артиста Іван Бровді

Вчера, 2. марця, на 84 році жытя вмер Іван Бровді, підкарпатскій русиньскій маляр, скульптор, монументалиста. Поінформувала о тым Мукачівска містецка рада на своім офіцияльным сайті в сіти Facebook. Артиста вродил ся в 1939 р. в селі Онок. За свою творчіст был вельократно нагороджуваный. Был лавреатом містецкой умелецкой преміі ім. Александа Духновича, премій Адальберта Ерделия і Йосифа Бокшая, членом Нацийональной спілкы артистів Украіны, заслуженым учытельом Украіны. Мал званя «Заслуженого артисты Украіны» і «Народного артисты Украіны». Был почестным громадянином Мукачева. Створил великє чысло монументальных робіт, бронзовых і деревяных рельєфів. Вельо з них є повязаных з русиньском історийом і культуром. В малярскых роботах продолжувал русиньску Підкарпатску Малярску Школу. В Мукачеві творил монументальны бронзовы різбы, м.ін. находячый ся в центрі міста памятник святых Кірила і Методия. Іван Бровді был автором бронзового карпатского медведя – русиньского оскара, котрый є передаваный лавреатови преміі ім. Александра Духновича за русиньску літературу.

Колекта на ремонт і консервацию лемківской капличкы в селі Долгє

Кєд поведе ся зобрати выстрчаючы середкы, проведены будут ремонтовы і консерваторскы працы лемківской капличкы в селі Долгє в ґміні Санкова. Ремонт проведе Шымон Моджеєвскій, основатель Стоваришыня Маґурич. Капличка была в 2012 р. вступні зложена волонтерами, але тепер зас вымагат зложыня, вычыщыня і консервациі. В рамках ремонту дороблены будут бракуючы елементы: камінна куля, метальовы дверці і кутый крест, а в середині буде поміщена ориґінальна фіґура Божой Матери з Дітином, якій будут привернены головы. Капличка была фундувана Михалом Кусайлом в 1869 році. Обєкт не має ниякых одповідників, є свого рода твором лемківскых каменярів. Належыт до найстаршых на Лемковині. Середкы на ремонт і консервацию капличкы сут збераны в соспільній колекті на сайті zrzutka.pl. Передвидуваный кошт вшыткых робіт то 20 000 злотых.

Фінісаж выставы батіків інспіруваных творчістю Юрия Новосільского

Днес в Музею Ікон в Варшаві проходит фінісаж выставы батіків інспіруваных творчістю Юрия Новосільского. В його рамках на год. 18.30 заплянуваны были выклад директора музею Віталия Міхальчука пн. «Нове тіло. Облечыня і тканины в штуці і досвіді православной літургіі» та дискусия з кураторком выставы Ізабельом Залевском-Кантек. Стріча пройде традицийно в рамках музейного семінара «Вколо Новосільского», посвяченого православній штуці і мысли, інтуіциям, якы православна літургія дає для модерной штукы.

Джерело фотоґрафіі: Нацийональный Архів в Кракові