Сумар дня 28. квітня/апріля 2023 р.

Приносиме вам сумар медияльной ґрупы ЛЕМ.фм+ на ден 28. квітня/апріля 2023 р.

Дальшый одтинок медженародного шляку Via Carpatia

Ґенеральна Дирекция Державных Доріг і Автострад запрезентувала візуализацию узла експресовой дорогы С19 в Місци Пястовым. Недавно зачата будова одтинка Коросно – Місце Пястове має ся завершыти в третім кварталі 2025 рока. В рамках інвестициі будут побудуваны два дороговы узлы. Узел Коросно получыт експресову дорогу С19 з державном дорогом нр 19 і повітовом дорогом нр 1973Р, а узел Місце Пястове буде лучником з державном дорогом нр 28. Окрем того побудуваны будут мосты, віадукты, переходы для звірят і перепуст під головном трасом. На дорозі буде поміщене ґратя безпекы дорогового руху і охороны середовиска. Перебудуваны або розбудуваны будут окрем інчого колідуючы дорогы і технічна інфраструктура. Одтинок Коросно – Місце Пястове то будучый фраґмент медженародного шляку Via Carpatia, якій получыт Литву з Грецийом. Будова одтинка буде коштувала 365 млн злотых. Доцільово в підкарпатскым воєвістві дорога С19 буде мала долгіст ок 169 км. Дале од Місця Пястового дорога піде до Дуклі і Барвінка. По завершыню робіт, шляком Via Carpatia мож буде переіхати Польщу од границі в Барвінку, через Ряшів, Люблин, Білосток, Елк і Сувалкы до границі державы в Будзіску.

Словация приверне контролю на границях

Од 24. мая до 8. червця/юнія Словация приверне контролю на границях з Польщом, Чешском Республиком, Австрийом і Мадярами, та на аеропортах. Рішыня тото власти арґументували медженародном конференцийом безпекы Globsec та жданом стрічом президентів ґрупы Б9. Як подал міністер внутрішніх прав Словациі Роман Мікулец, на конец мая в Братиславі в конференциі Globsec возмут участ політикы і інчы публичны особы з Европы і другых части світа, зато запевніня высокых стандардів безпекы для той медженародной подіі єст пріоритетом. В результаті границю зо Словацийом мож буде перекрочыти лем на граничных переходах. Выняткы сут передвиджены м.ін. для ратівників, рільників і інчых осіб, якы працуют на рольных і лісовых ґрунтах на обшыри пятьох кілометрів од границі.

Ремонт повітовой дорогы в Ропі

Неодолга зачне ся ремонт повітовой дорогы в Ропі. Повітовый Заряд Доріг в Ґорлицях поінформувал, што в звязку з початком ремонту дорогы нр 1505К в місцевости Ропа од 8. мая од 10.00 год. ремонтуваный одтинок буде закрытый для руху. Завершыня робіт єст плянуване на конец мая тр. Обізд є вызначеный державном дорогом нр 28 і воєвідском дорогом нр 981.

Припоминаме, што в віторок 2. мая в Санковій одбуде ся Історичный пікнік в 108. річницю Битвы під Ґорлицями. На подію просят війт ґміны Санкова разом з бургомайстром Міста Ґорлиці і Реконструкцийном Історичном Ґрупом Ґорлиці 1915. Подія зачне ся од одданя чести жолнірям похороненым на цмонтерях в Ґорлицях, Ропици і Маластові. Пізнійше пікнік перенесе ся уж до Санковой, де од місяця рыхтувана была сценоґрафія до головной части проґраму – історичного видовиска. В меджечасі мож буде купити дашто од ремісників, пообзерати аероплян ци попрібувати горохову поливку. Попри подіі орґанізуваный єст тіж пілмаратон. Цілый плян акциі находит ся на сайті ґміны Санкова.