Сумар дня 25. квітня/апріля 2024 р

Приносиме вам сумар медияльной ґрупы ЛЕМ.фм+ на ден 25. квітня/апріля 2024 р.

Єст шанса для «Бесіды»

Як сме інформували, м.ін. лемківскій часопис «Бесіда» не отримал на тот рік дофінансуваня зо стороны Міністерства Внутрішніх Справ і Адміністрациі. Тото быти може уж неодолга ся годно змінити. Вчера МВСіА оголосило конкурс оферт, на основі котрого меншыновы орґанізациі можут складати внескы о дофінансуваня іх діяльности. То як раз можливіст м.ін. для Ствоаришыня Лемків на зголошыня до розмостріня тых проєктів, якы не отримали дофінансуваня початком рока – м.ін. на часопис «Бесіда», діяльніст ЛАПіТ «Ластівочка» ци орґанізацию Медженародного Бієнале Лемківской/Русиньской Культуры в Креници. Внескы о дофінансуваня меншыновы орґанізациі можут посылати до 20. мая. Рішыня Міністра в тій справі має быти оприлюднене найпізнійше до 12. липця/юлия. Покля што м.ін. выдаваня «Бесіды» ведене мусит быти з власных середків редакторского колективу і Стоваришыня Лемків.

Вмер проф. Міодунка

Вчера вмер проф. Владислав Міодунка, выдатный польскій языкознавця, специялиста ґлоттодидактикы, бадач польско-чужого білінґвізму, автор вельох ціненых науковых публикаций, з котрых вельо мало піонерскій характер. Проф. Владислав Міодунка был абсольвентом Ягайлоньского Університету і наукову карєру продолжал як раз на alma mater. Основал Заклад Стосуваного Языкознавства, был серед орґанізаторів Катедры Латиньской Америкы в Інституті Реґіональных Студий Ягайлоньского Університету, довюл і до основаня Державной Комісиі Посвідчаня Знаня Польского Языка як Чужого. Перед десятьома роками редактор Богдан Ґамбаль запросил проф. Міодунку до студия радия ЛЕМ.фм, жебы звідати го м.ін. – чом треба нам ся вчыти лемківского языка? Кого вчыти? Як вчыти? По што вчыти, а тіж хто повинен вчыти, а хто ні? Одповіди проф. Міодункы сут актуальны для нас Лемків і днес. Вічна Йому Памят.

Маівка в Польковицях

Як інформує польковицкій Центр Культуры, 4. мая з нагоды тзв. маівкы в Брацкым Парку одбуде ся шор подій, серед котрых каждый жытель Польковиц выбере дашто для себе. То м.ін. ґалерия штукы в пленері, гры і забавы для наймолодшых, але тіж і інчы атракциі. Од 16.00 год. участникы акциі будут мочы послухати музику в зоні chillout. Ґміна Польковиці просит вшыткых, котры на тзв. долгій майовый вікенд не выізджают поза місто, жебы брати активну уьаст в спільній забаві.

Митрополитарна Синодальна Стріча на Словациі

В днях 19.-20. квітня/апріля в Грекокатолицкым Молодіжным Центрі Барка в Юсковій Воли на Словациі одбыла ся Митрополитарна Синодальна Стріча, в котрій брали участ вшыткы владыкы Грекокатолицкой Церкви sui iuris на Словациі вєдно зо священниками, монашеством і лаіками. Вчас тых двох дни задумували ся они над документом Синодальна церков на місиі з першого засіданя 16. рядного згромаджыня Синоду єпископів в Римі, котре одбыло ся в жолтни/октобрі 2023 р. в рамках проходячого синоду «За синодальну Церков».