Сумар дня 20. марця 2023 р.

Приносиме вам сумар медияльной ґрупы ЛЕМ.фм+ на ден 20. марця 2023 р.

Інформацийнa стрічa в справі розбудовы державной дорогы нр 28

Ґенеральна Дирекция Державных Доріг і Автострад просит на інформацийну стрічы в справі розбудовы державной дорогы нр 28, яка пройде в Ґорлицях в четвер 23. марця. Тема будовы ронд, якы бы мали заступити колізийне скрижуваня на державній дорозі ідучій через Ґорлиці, є піднимана уж од долгого часу. До увагы была брана будова аж і пятьох ронд. На інформацийній стрічы будут представлены і омовлены актуальны проєктовы розвязаня. Окрем стрічы сут на тот ден заплянуваны дижуры, на котрых буде мож індивідуально бесідувати з проєктантами фірмы рыхтуючой документацию. Інформацийны материялы мож уж тепер найти на інтернетовым сайті проєкту.

Можлива зміна в складі СКУтНіЕМ

Міністерство Внутрішніх Справ і Адміністрациі подало до публичной інформациі, што в звязку зо зложыньом внеску о одкликаня єдного з двох представників ромской етнічной меншыны зо складу Спільной Комісиі Уряду та Нацийональных і Етнічных Меншын, згідні з уставом о нацийональных і етнічных меншынах та о реґіональным языку буде зачата процедура консультуваня зміны в складі реченой Комісиі. Писмо, жебы заняти становиско што до конечности особовой зміны, буде скєруване до орґанізаций репрезентуючых ромску меншыну, в тым особливо до тых, котры протягом 5 послідніх років выступували до Міністерства з внесками о дотациі на реализацию задач, котрых цілю єст охорона, захованя і розвиток культуровой достоменности нацийональных і етнічных меншын і розвиток реґіонального языка. По закінчыню консультаций властивый міністер до справ реліґійных конфесий та нацийональных і етнічных меншын выступит до Презеса Рады Міністрів з внеском, жебы провести одповідню зміну в складі Спільной Комісиі. Така сама інформация была подана Міністерством 1. лютого/фебруара в звязку зо зложыньом внеску о одкликаня представника лемківской етнічной меншыны.

«При джерелах натуры»

Як подал Маґурскій Нацийональный Парк, в днях од 6. до 9. липця/юлия тр. в Крампній одбуде ся природничый фестіваль «При джерелах натуры». То штырі дни стріч, выкладів і варштатів в терені з природниками. Подія єст направлена на дорослы особы, не лем специялистів в обшыри природы. То нагода придбати новы природничы здібности, а при тым познати, чым ся занимают природникы Маґурского Парку. Запрошены гості будут вести тематичны стрічы посвячены природничым темам, котрыма ся занимают науково. Фестіваль буде ся складал з осмох практичных тереновых варштатів і трьох выкладів. Будут они додатково записуваны в формі награнь і удоступняны в сіти. Полный проґрам подіі появит ся неодолга.

Лемківско-Погіряньскій Великодній Ярмак

Уж в тоту в неділю 26. марця в Мазярскій Загороді в Лоси пройде Лемківско-Погіряньскій Великодній Ярмак, орґанізуваный Музейом Дворы Карвациянів і Ґладышів. Головном атракцийом ярмаку буде презентация выробів ремісників і народных творців та можливіст купити розмаіты товары. В проґрамі подіі находят ся м.ін. великодні варштаты і презентациі, в тым лемківскых яєц ци погіряньской пальмы. Не бракне тіж традицийных забав звязаных з Великодньом. Полный проґрам подіі находит ся на сайті музею.