Сумар дня 2. мая 2024 р.

Приносиме вам сумар медияльной ґрупы ЛЕМ.фм+ на ден 2. мая 2024 р.

Лемкы заграли в благодійным турніры

В суботу, 27. квітня/апріля в Пшемкові проходил благодійный футбольовый турнір, в котрым брали участ ріжны команды, якы наштоден творят Охотничы Протиогньовы Стражы. Турнір был зорґанізуваный пшемківскыма стражаками для помочы для Каєтана – сына єдного з пшемківскых пожарників. В змаганях взала участ і лемківска команда – як репрезентанты села Михалів. Лемківска команда рахувала 9 футболистів, были то: Андрий Басалыґа, Павльо Басалыґа, Патрик Лучковец, Андрий Кайфаш, Богдан Копча, Яков Прибыло, Юрко Шпытко, Михал Ґожыньскій і Севериян Косовскій. Лемківска команда мала зрыхтуване специяльні на тоту подію облечыня, на котрым находили ся нашы нацийональны символы, в тым м.ін. русиньскій ерб. Завдякы змаганям повело ся зобрати шумну суму грошів для потреб малого Каєтана.

Русиньскій Музей кличе на Ніч Музеів

Музей Русиньской Культуры оголосил проґрам тогорічной Ночы Музеів, яка одбуде ся 18. мая. В рамках подіі своі принагідны выставы вкаже тіж як раз русиньскій музей в Пряшові. Цикль подій зачне ся уж о 13.00 год. в музейных просторах. О 15.00 год. выступит Домініка Новотна і ФА Полонина, а вкажут традицийне чепліня молодиці. Буде тіж дашто присвячене Енді Варгольови, а і дальшы акциі, якы в тот вынятковый ден будут вказаны в русиньскым музею. Проґрам найдете на сайті Музею Русиньской Культуры в Пряшові.

Польковицкій Ровер

Од вчера, 1. мая Польковичане годны хоснувати систем містецкого Польковицкого Біциґля. В сумі в Польковицях є тепер доступных 70 дармовых роверів, в тым 10 з креслами для діти. В місті є в сумі 26 стаций. Як коментувал уступуючый бургомайстер Польковиц Лукаш Пузнєцкій, проґрам тішыл ся уж перше великом популярністю. Завдякы ньому може ся зменьшыти рух авт на улицях, што тіж перекладат ся м.ін. на стан повітря в місті. Перше 15 минут біциґля є безплатне, а кажда дальша минута то лем 10 ґрошів.

Свидницкій окрес може модернізувати дорогы

Міста і села в свидницкым окресі на Словациі можут отримати середкы на реконструкцию доріг, шкіл або на збільшыня безпекы. Фінансы ідут з Міністерства Інвестиций, реґіонального розвитку і інформатизациі. По стрічы з заступцями самосправ то оголосил словацкій міністер Ріхард Раші. З 1,9 мілиярда евро з еврофондів, котры сут в тым році выділены, є з нового операцийного проґраму для пряшівского краю выділене більше як 280 мілийонів евро. Раші тіж авізувал, же в найблизшых днях буде выголошена оферта на реконструкцию основных і середніх шкіл. Хотят, жебы векша част фінансів была спрямувана до моденізациі основных шкіл, котры сут в компетенциі міст і сел.