Сумар дня 2. марця 2023 р.

Приносиме вам сумар медияльной ґрупы ЛЕМ.фм+ на ден 2. марця 2023 р.

Краківскы грекокатоликы посвятили каплицю з іконостасом Новосільского

2023 рік был выголошеный Роком Юрия Новосільского, в 100. річницю народжыня артисты. З той нагоды в ріжных місцях Польщы одбывают ся тепер розмаіты подіі. Єдна з них проходила в остатню суботу, 25. лютого/фебруара в краківскій грекокатолицкій парохіі Воздвижыня Честного Креста. В тот ден до краківской церкви прибыл архієпископ Євген (Попович), митрополита перемышльско-варшавской архієпархіі УГКЦ в Польщы. Медже інчыма одбыло ся посвячыня одновленой бічной каплиці святыні, в якій містит ся давный іконостас авторства Новосільского, а при тым і інчы його іконы. Іконостас был выконаный на зламі 60. і 70. років ХХ ст. первістно до єдной з бічных каплиц костела св. Катажыны в Кракові, де молили ся товдышні грекокатолицкы вірны. Пак, коли вірны одзыскали храм при ул. Вісльній 11, іконостас забрали зо собом. Слово на подіі мала і запрошена на ню др Кристина Черні, біоґрафка Юрия Новосільского. Сам артиста з краківском церквом на Вісльній звязаный был такой од свого початку – был в ній крещеный в 1923 р.

Варголь в Саудискій Арабіі

Енді Варгол то артиста присутный на цілым світі, але дотля не было на Близкым Сході выставы, котра вказувала бы його творчіст. Експозицию пн. «FAME» вказуют тепер як раз в реґіоні міста Аль-Уля. «FAME: Andy Warhol in AlUla» то безпрецеденсова подія – перша в істориі выстава Енді Варголя в Саудийскій Арабіі. Образы Варголя вказуваны сут в рамках другой едициі Фестівалю Штукы АльУля. Од 17. лютого/фебруара выставу мож обзерати в Марая – найвекшым на світі будинку в цілости вкрытым дзеркалами. На выставі орезентуют образы і ґрафікы звізд Голивуд, леґенд спорту, музиків, м.ін. Елізабет Тейльор, Мугаммеда Алі ци Долі Партон, а тіж чорно-білы фільмовы портреты осіб приходячых до Фарбикы. В окремым поміщыню презентуваный єст і переломный твір «Silver Clouds». Одкрытю выставы в Арабіі товаришыли в медиях i неприхыльны коментарі – критика взглядом рішыня директора Музею Варголя в Пітсбурґу о спілпрацы з Королівством Саудийской Арабіі. Тыкала она факту, што Варголь был гомосексуалистом, а Саудийска Арабія узнає гомосексуализм за злочын, за котрый горозит аж і кара смерти.

Показ фільму о ґрафыні Потоцкій

В найблизшу неділю 5. марця о 15.00 год. в кіні Сокіл в Рыманові одбуде ся премєра фільму під назвом «Памятник ґрафыні Анны». То оповіст вказана на основі памятника Анны з Дзялиньскых Потоцкой, польской соспільной і освітовой діячкы, спілоснователькы Рыманова як курорту. Екранізация оповідат о жытю Анны Потоцкой на основі єй особистых записків, якы посмертно печатали в 1927 році, а репрінт – в 70. роках ХХ ст. та в 1998 році (коросняньскым выдавництвом Рутенус). Діі Потоцкой тыкали і положыня Лемків. Основала она в 1873 р. Різбярску Школу при дворі Потоцкых в Рыманові, учениками якой были в великій мірі представникы лемківской молодежы з поблизкых сел. Зо Сницарні Потоцкых вышло вельо талантовитых Лемків. По ІІ світовій войні жытелів Балутянкы і Вількы выселили на радяньску Украіну, де народны артисты старшого і молодшого поколіня продолжали традицию нашого різбярства.

Коло Нижньой Писаной нашли амуніцию з часів ІІ світовой войны

В остатній віторок жытель Нижньой Писаной (нашого села на Пряшівщыні) повідомил місцеву поліцию, же нашол незнану амуніцию в корыті потока Капішовка, в лісі медже Нижньом а Вышньом Писаном. На місце пришли піротехнікы, котры подали, же іде о зброю з ІІ світовой войны і то конкретні о два 75-міліметровы ґранаты. Ґранаты были підданы ліквідациі. То уж не першый такій припадок в остатніх роках на Пряшівщыні. Припомнийме, што подібну зброю што якісый час находят і жытелі Лемковины. Остатнє великє выкопалиско нашли в вересни/октобрі 2020 р. на пути в Розділю.