Сумар дня 2. квітня/апріля 2024 р.

Приносиме вам сумар медияльной ґрупы ЛЕМ.фм+ на ден 2. квітня/апріля 2024 р.

Ґорлиці партнером медженародного проєкту «GOV4PeaCE»

Місто Ґорлиці буде реализувало медженародный проєкт пн. «GOV4PeaCE» звязаный зо спадковином І світовой войны. Доцільово місто хоче вознести Европейскій Музей І Світовой Войны. Минулого рока Ґорлиці, як партнер проєкту, вєдно з десятьома інчыма підметами з шестьох держав: Словениі, Італиі, Бельґіі, Польщы і Мадяр зложыли внесок до Проґраму Інтерреґ Серединна Европа 2021-2027 пн. «Модель вельовымірового і меджетериторияльного заряджаня активацийом спадковины І світовой войны цілю підпераня зрівноваженого соспільно-господарчого розвитку далекых територий Серединной Европы». Рішыньом Проґрамовой Комісиі проєкт достал дофінансуваня. Сумарична вартіст задачы для Міста Ґорлиці то 156 800 евро, што буде перезначене на зорґанізуваня медженародной конференциі та опрацуваня мериторичной концепциі Европейского Музею І Світовой Войны. Задача обнимат тіж інвентаризацию обєктів і місц звязаных з І світовом войном на обшыри малопольского воєвідства. Діяня міста буде сперал Інститут Істориі Ягайлоньского Університету. Фінальным ефектом буде опрацуваня і підписаня медженародной декларациі дальшой спілпрацы. Проєкт буде реализуваный од мая 2024 до жолтня/октобра 2026 рока.

Церкви в Брунарах, Репеди, Бортным, Реґєтові, Ліщынах і Дубным отримали дофінансуваня з конкурсу «Охорона забытків»

Міністерство Культуры і Нацийональной Спадковины в остатніх днях марця оголосило результаты конкурсу «Охорона забытків». В першым того рока наборі міністерство признало близко 168,5 млн зл на реализацию понад 450 задач. Цілю конкурсу єст фінансова підпора ремонтовых і консерваторскых прац при забытковых перлинах в цілій Польщы. Серед нагородженых нашли ся тіж обєкты з Лемковины. Найбільше дофінансуваня – понад 1,5 млн зл отримала Парохія в Брунарах на закінчыня ІІІ етапу ремонтовых прац при церкви пв. Св. Михала Арханела. Грекокатолицка Парохія в Репеди фінансове спертя перезначыт на остатній етап консервацийных робіт при поліхроміі в церкви св. Миколая. В храмі в Бортным дофінансуваня дозволит на консервацию 6 ікон. В реґєтівскій церкви пройде дальша консервация ікон з іконостасу. Православна парохія в Ліщынах отримат 250 тис. зл на ремонт даху і елевациі, подібну квоту підпоры римокатолицка парохія в Лелюхові передаст на консервацию поліхроміі при церкви в Дубным. Внескодавці, котрых проєкты не отримали дофінансуваня, до 7. квітня/апріля можут складати одкликаня в тій справі.

Зміны в руху в Польковицях

Місто Польковиці інформує, што днес, 2. квітня/апріля зачал ся шестый етап прац при перебудові ронда на скрижуваню Алеі Яна Павла ІІ і Алеі Юзефа Пілсудского та ул. Кардинала Болеслава Комінка. Звязку з тым в годинах од 7.00 до 17.00, в часі укладаня асфальтовой масы, обовязувати будут зміны в руху – выізд з ул. Кардинала Болеслава на высокости ул. Млиньской буде закрытый для руху, при захованю доізду до гандльового центра. Доізд до воєвідской дорогы буде вюл через ул. Млиньску до Оґродовой. Зміны в руху будут обовязувати до закінчыня бітумічных прац, пак верне схема руху з другого етапу ремонтовых прац, з можливістю выізду з ул. Кардинала Болеслава. В часі тырваня робіт просит ся о триманя особливой осторожности і звертаня увагы на ознакуваня.

В Бєщадах порахували жубры

Як передал представник Реґіональной Дирекциі Державных Лісів в Коросні, марцьова інвентаризация вказала, што в Бєщадах прожыват понад 800 жубрів, а іх стада находят ся на обшыри надлісництв: Балигород, Тисна, Команча, Ліско, Лютовиска і Ступосяны. Шторічне рахуваня жубрів єст тіж нагодом, жебы окрислити стан здоровля популяциі. Уж од долшого часу науковці занимаючы ся тым ґатунком выражают занепокоіня дост густом популяцийом жыбрів на невеликій обшыри, што вяже ся з хворотами, як і шкодами на орных і лісовых землях.