Сумар дня 18. квітня/апріля 2024 р

Приносиме вам сумар медияльной ґрупы ЛЕМ.фм+ на ден 18. квітня/апріля 2024 р.

Засідала СКУтНіЕМ

Вчера, 17. квітня/апріля, в просторах Міністерства Внутрішніх Справ і Адміністрациі одбыло ся засіданя Спільной Комісиі Уряду та Нацийональных і Етнічных Меншын. То перше од 9 місяців засіданя комісиі, скликане уж по змінах власти. Засіданя одкрыл Марцін Кєрвіньскій, Міністер Внутрішніх Справ і Адміністрациі. Проф. Ева Міхна, окрем представліня свойой функциі в процесі признаваня ґрантів, выразила непокій, же часто бюрокрация выгрыват над цілю, для якой повинны быти признаны. До того і брак контакту зо стороны міністерияльных урядників, што при великій системовій зміні, яка одбыла ся влони, і новых формальностях, якы сполнити мусіли орґанізациі, довело до одшмаріня напр. ґранту на найстаршу повыселенчу лемківску ґазету «Бесіда». В острых словах («без куртуазиі», як сама заповіла) выступила проф. Олена Дуць-Файфер, котра скритикувала вельо діянь, якы не спричыняют,ся аж і обнижают статус і ранґу меншыновых языків. Присутный на засіданю был і Євген Габура, шеф лемківскых ансамблів Ластівочка і Ластівчата. Колоктивы, якы діют при кружку Стоваришыня Лемків в Пшемкові, не достали дофінансуваня на 2024 р. Новопокликана на функцию заступничкы директора Департаменту Віроісповідань та Нацийональных і Етнічных Меншын Ксеня Альгауґ представила пляны і принципы найблизшого набору міністерияльных внесків, якы мают мати процедуральны полегшыня, а і простійшы і яснійшы принципы.

В суботу Конґрес Стоваришыня Лемків

7. квітня/апріля 1989 р. адміністрацийный выділ воєвідского уряду в Ліґници зареґіструвал Стоваришыня Лемків – першу повоєнну лемківску орґанізацийю, котра зродила ся на фоні демократизациі жытя в Польщы. Як раз того рока орґанізация споминат 35. річницю од даты офіцийного основаня. Річниця сходит ся з заплянуваным на найблизшу суботу, 20. квітня/апріля Х Конґресом Стоваришыня Лемків, якій одбуде ся в Ліґници. Конґрес – як найвысша статутова власт Стоваришыня – рішыт м.ін. о абсолюториі для уступуючого правліня, а так само в його рамках выбраны будут ведучый Головного Заряду Стоваришыня Лемків і новы члены двох орґанів – Головного Заряду та Головной Ревізийной Комісиі. Вчас конґресу делеґаты і запрошены гості будут мочы зголошувати постуляты до покликаной в тым ціли Комісиі Постанов і Внесків. Дотепер одбыло ся девят конґресів, а окрем них і штырі Надзвычайны Конґресы, якы были посвячены актуальным проблемам і внескам складаным членами орґанізациі. Першый – історичный – конґрес СЛ одбыл ся 8. грудня/децембра 1990 р. в Ліґници.

Поможме родині покійного о. Дария Макуха

Як інформує православна парохія Благовіщыня Пресвятой Богородиці в Мальчыцях, з благословліня владыкы Юрия, архієпископа вроцлавско-щеціньского ПАПЦ, зачала ся збірка фондів на поміч для імости Анны Макух і єй діти. 4. квітня/апріля вмер о. протодіакон о. Дарий Макух, якій служыл в мальчыцкій церкви. Родина покійного о. Дария нашла ся тепер в тяжкых обставинах, прото заохочаме спомочы в потребі. Грошы мож вплачати на конто мальчыцкой парохіі: 16 9589 0003 0006 4246 2000 0010 з дописком: Pomoc dla matuszki Anny Makuch.

Польковицкій Пілмаратон

В найблизшу суботу 20. квітня/апріля в Польковицях одбуде ся ІІІ едиция 20 ATT RUN FUN Польковицкій Пілмаратон. В рамках імпрезы одбудут ся змаганя для діти і молодежы, марш 5 км nordic walking і змаганя на дистансі 10 км і 21,1 км. Траса змагань веде через околичны села: Тжебч, Коморникы, Жуків і Ґузіце. В рамках подіі буде тіж благодійна акция, котру орґанізує Центр Культуры в Польковицях і Польковицкій Центр Волонтарияту.