Сумар дня 18. квітня/апріля 2023 р.

Приносиме вам сумар медияльной ґрупы ЛЕМ.фм+ на ден 18. квітня/апріля 2023 р.

Музей Енді Вархоля в Меджелабірцях в новій одслоні

Як інформувала представничка Пряшівского Самосправного Краю, в пятницю 14. квітна/апріля зачала ся комплексова модернізация Музею Модерной Штукы Енді Вархоля в Меджелабірцях. В єй рамках плянувана єст м.ін. зміна елевациі, розбудуваня музею о новы поміщыня, де найдут ся артистичны працовні, простір до ведіня едукацийных проґрамів і для новых цікавых експозиций. В змодернізуваным будинку найде ся тіж місце до одпочынку і амфітеатр. Ціліст дополнят модерны інтерактивны елементы. Ремонт має тырвати 18 місяців і коштувал буде понад 12 млн евро. Як підкрисляют власти ПСК, музей ма характер понадреґіональный, праві нацийональный. То важный пункт для розвитку реґіону, а рішыня о модернізациі то безпосередня підпора розвитку туристикы. Більше про зміны в музею чытайте в статі на нашым портали.

Народный Музей в Низкым Бескіді – колекта

На сайті зrzutka.pl зачала ся колекта на створіня Народного Музею в Низкым Бескіді. Ведена єст Маґдаленом Скварніцком-Моравском, мрийом котрой єст одкрыти музей, де мож буде не лем видіти, як выглядало жытя колиси, але тіж самому почути, як то было. Скварніцка-Моравска од років зберала ріжного рода предметы хоснуваны в штоденным жытю, напр. меблі, нарядя до рыхтуваня мукы ци до робліня тканин. Доцільово в музею мают быти ведены многы тематичны варштаты, м.ін. робліня тканин, а пак шытя з них облечыня, плетіня з лозины, різбліня в дереві, писаня ікон ци печыня хліба, а вшытко тото при акомпаніяменті лемківской і польской музикы. Плянів на будуче єст дуже, бракує лем фінансовых середків. Цілю збіркы єст покрыти кошты розставліня в новым місци старой лемківской хыжы, котру Скварніцка-Моравска вратувала перед розбуріньом. Треба зобрати аж 300 тис. зл. Хыжа, а разом з ньом новый музей, найде ся в Поляньскій Гуті. Мотузок до колекты найдете на нашым портали.

Нова туристична атракция Мушыны быти може буде скорше оддана до хоснуваня

Іде о видокову вежу на горі Мальник над Мушыном. Верх Мальника находит ся на высокости 726 метрів над рівньом моря. Мож з него обзерати Любовняньску Верховину, Пусту Велику, Креницку Яворину, Татры ци Малы Пєніны. А як передал бургомайстер Мушыны Яна Ґольба, одкрытя новой інвестициі быти може одбуде ся скорше, як плянували. Закля што власти не подают докладной даты, але інформуют, же як лем погода позволит, то зачнут ся роботы при фундаментах. Решта конструкциі жде готова в выконавці на перетранспортуваня і зложыня на місци.

Устава про узнаня Шлезаків етнічном меншыном онедолга вкаже ся в соймі

Посол Мацєй Копєц заповіл, што в найблизшым часі представит в соймі уставу о дописаню Шлезаків як етнічной меншыны в уставі о нацийональных і етнічных меншынах. Як передал на своім фейсбуковым сайті – уставу напише спільні зо шлезскым активістом Рафалом Жепком та при консультациі зо Шлезском Реґіональном Партийом – Шлезска Штама. Устава буде дополніньом уставы Монікы Росы про узнаня шлезского як реґіонального языка, котра фурт жде в соймі, і дополніньом працы Лукаша Когута на европейскым форумі. Припоминаме, што згідні зо вступныма результатами Нацийонального Повселюдного Списуваня веденого в Польщы в 2021 р. понад піл мілийона жытелів Польшы окрислило свою нацийональніст як шлезску. Єст то найбільша етнічна меншына, котра цілый час не єст правні узнана етнічном меншыном.