Сумар дня 17. квітня/апріля 2024 р

Приносиме вам сумар медияльной ґрупы ЛЕМ.фм+ на ден 17. квітня/апріля 2024 р.

Мож складати внескы о дофінансуваня резервуарів на дощову воду

Жытелі ґміны Санкова можут старати ся о дотацию на закуп герметичных резервуарів на дощову воду з обємністю од 500 до 1000 літрів, жебы затримувати і маґазинувати дойджову воду, а пак хоснувати єй на потребы ґаздівкы і загороды. На єдну хыжу мож старати ся о закуп з дофінансуваньом двох штук резервуарів. Деклярацию приступліня до проґраму треба скалдати особисто в Уряді Ґміны Санкова, посередництвом традицийной почты, або електронічні – на майль: ugsekowa@sekowa.pl або через плятформу еПУАП, до дня 29. квтіня/апріля. Дофінансуваня буде можливе, о кілько буде заінтересуваня ним мешканцями – товды то Ґміна Санкова буде могла приступити до проґраму Самоуряду Малопольского Воєвідства «Малопольска дощівка 2024» і отримати фінансовы середкы.

Уряднкы в митрополиты

В понедільок 15. квтіня/апріля Высокопреосвященый Йона, пряшівскій архієпископ і митрополита стрітил ся в своій сідибі з пряшівскым бургомайстром Франтішком Ольгом і рандиками містра Пряшів. Власти міста пришли до Грекокатолицкого Аргієпископского Уряду на запрошыня митрополиты. Архієпископ Йона подякувал гостям за дотеперішню спілпрацу міста з Грекокатолицком Церквом і высловил надію, што буде ся она розвивала на благо мешканців.

Студиюваня русиністикы зо стипендийом

Інститут Русиньского Языка і Культуры Пряшівского Університету оголосил набір на ліценциятскы студиі для заграничных студентів з можливістю отриманя стипендиі – 4000 евро на рік. Пряшівскій Університет то єдиный університет на Словациі, на котрым мож студиювати русиністику. Як поінформувала директорка Інституту др Анна Плішкова, о стипендию можут старати ся студены споза Словациі, якы придут студиювати в академіцкым році 2024/2025. Реґіструвати мож ся іщы до 30. червця/юнія.

Капличка в селі Доглє дале в потребі. Поможме

Фурт заохочаме доложыти цеголку до ремонту лемківской капличкы в селі Долгє. Была она в 2012 р. вступні зложена волонтерами, але тепер зас вымагат зложыня, вычыщыня і консервациі. В рамках ремонту в половині мая тр. дороблены будут бракуючы елементы: камінна куля, метальовы дверці і кутый крест, а в середині буде поміщена ориґінальна фіґура Божой Матери з Дітином, якій будут привернены головы. Капличка была фундувана Михалом Кусайлом в 1869 році. Обєкт не має ниякых одповідників, є свого рода твором лемківскых каменярів. Єст єдным з найстаршых на Лемковині. Середкы на ремонт і консервацию капличкы сут збераны в соспільній колекті на сайті zrzutka.pl. Передвидуваный кошт вшыткых робіт то 20 тис. злотых. На тот момент зобрано нецілых 10 тис. злотых. Ремонт проведе Шымон Моджеєвскій, основатель Стоваришыня Маґурич. В рамках нагорід для осіб, котры хотят доложыти ся до ремонту, мож достати специяльне керамічне горнятко або выліцитувати акварелю «Кіт в Бодаках» Данєля Щербы ци найновше выдавнитцво односяче ся до Лемковины – альбум «Низкій Бескід на фотоґрафіі Станіслава Криціньского».

Зелено в Польковицях

В польковицкым ратушы одбыла ся конференция, котра была підсумуваньом проєкту пн. «Зелено-синя інфраструктуря в Польковицях». Серед зреализуваных задач были насаджыня ріжной рослинности (то аж 21 тис. новых рослин), реализация фраґментів роверовой стежкы і зревітализуваня веце як 13 гектарів зеленых обшыри. Частю діянь проєкту были тіж едукацийны задачы, звязаны з підношыньом свідомости о тым, як повинно выглядати місто, жебы было приязне і зелене. Проведены были три конкурсы, котрых задачом было м.ін. накрутити короткы фільмы, в якых вказано проеколоґічны діяня. Вартіст цілого проєкту вынесла близко 6,5 млн зл.