Сумар дня 16. квітня/апріля 2024 р

Приносиме вам сумар медияльной ґрупы ЛЕМ.фм+ на ден 16. квітня/апріля 2024 р.

100 років істнуваня Державных Лісів і Головного Бескідского Шляку

Того рока выпадат 100. річниця істнуваня Державных Лісів, в звязку з тым в цілій державі протягом 2024 рока будут проходити ріжного рода подіі, котры лучат святкуваня з пропоґуваньом дбаня о природу. 100 років існуваня святкує тіж Головный Бескідскій Шляк. З той нагоды Стоваришыня Головного Бескідского Шляку і Надлісництво Лося просят на спільну подію, де будут празднувати свою округлу річницю. В рамках 100. річниці існуваня обох орґанізаций 27. квітня/апріля пройде одкрытя Туристичной Колибы «Липка», котра находит ся на червеным туристичным шляку медже Ізбами а Ропками в Низкым Бескіді. Подія зачне ся о 15.00 год. при новым обєкті. В пляні находит ся презентация колибы і спільне саджыня дерев, а на конец бівакуваня получене з прелекцийом на тему Головного Бескідского Шляку. Орґанізаторы задбали тіж о атракциі для наймолодшых участників. З орґанізацийных взглядів просит ся потвердити свою присутніст до 23. квітня/апріля майльовом дорогом. Контакт і докладну локализацию новой колибы найдете на офіцийным сайті Надлісництва.

«Спільна дорога через Історию – Битва під Ґорлицями»

Початком мая в Санковій традицийно пройде історична подія присвячена Битві під Ґорлицями. Того рока реконструкция пройде під гослом «Спільна дорога через Історию – Битва під Ґорлицями – з головным мотивом – Николи більше войны». В пляні стрічы орґанізаторе припомніня історичных фактів, вказаня не лем самых боів, але тіж штоденного жытя жытелів Ґорлиц і жолнірів. Заплянувано тіж много символичных елементів ци артистичных інтерпретаций, котрых задачом єст припомнути універсальне пересланя «Николи більше войны». Як што рока, подія єст одкрыта для вшыткых, каждый найде дашто для себе, в тым тіж діти і молодіж. Реконструкция пройде 4. мая в Санковій о год. 16.30, вступне дармо. Проєкт єст реализуваный при фінансовій підпорі Малопольского Воєвідства.

В Польковицях в Палаци Сухой Выжньой одкрыют Реґіональну Ізбу Спадковины

50 тис. зл дофінансуваня з Нацийонального Інституту Музеів «Ізба Памяти» отримал Центр Культуры в Польковицях на одкрытя Реґіональной Ізбы Спадковины в Палаци Сухой Выжньой. В рамках нового проєкту веденый буде центр едукациі для діти і молодежы. Ізба має уж першы експонаты, такы як машына до писаня ци народны облечыня, а перша выстава пройде в серпни/авґусті. Як передала кєрівничка з Центра Культуры в Польковицях, дофінансуваня дозволит на описаня згромадженых од жытелів ґміны предметів. Додатково онедолга представникы центра будут іздити до сельскых світлиц і інформувати жытелів, што можут переказати даякы стары памяткы ци предметы. Признане дофінасуваня тыкат першого етапу проґраму, але представникы Центра Культуры надіют, што быти може в другым етапі вдаст ся одкрыти полну выпосажену ізбу.

Василь Ябур нагородженый Золотым медайльом Пряшіского Університету

Як поінформувал Інститут Русиньского Языка і Культуры Пряшівского Університету, в понедільок 15. квітня/апріля прошло святочне засіданя Академіцкой Громады ПУ. В часі стрічы признано найважнійшу нагороду університету, котром єст Золотый медайль Пряшіского Університету. Того рока ректор університету – Петер Коня – нагородил Василя Ябура, єдного з двох головных кодифікаторів русиньского языка на Словациі. Василь Ябур был нагородженый за вызначну науково-педаґоґічну роботу і вклад в розвиток Інституту Русиньского Языка і Культуры Пряшівского Університету. Більше про нагородженого Василя Ябура можете прочытати на нашым сайті.