Сумар дня 15. мая 2024 р.

Приносиме вам сумар медияльной ґрупы ЛЕМ.фм+ на ден 15. мая 2024 р.

Храмове свято в Ліґници

В суботу 11. мая Православна Парохія Воскресіня Христового в Ліґници празднувала своє храмове свято. Того дня до ліґницкой спільноты пришол владыка Юрий, архієпископ вроцлавскій і щеціньскій, котрый в асисті священників правил Божеску Літруґію. Присутный были м.ін. о. Славомир Сороканич, о. мит. Марек Боніфатюк ци о. прот. Павел Мілько – парох православной парохіі в Мельнику в Чехах. Проповід выголосил о. мит. Юрий Щур, парох катедральной парохіі во Вроцлаві і парохіі в Олесници. Тема проповіди навязувала до Пасхы, в звязку з фактом, што храмове свято того тока выпало в Велику Суботу. Вчас літургіі архієпископ Юрий в імени Собору Єпископів Польской Афтокефальной Православной Церкви нагородил пароха ліґницкой церкви о. Любомира Воргача правом ношыня митры. По богослужыню владика Юрий звернул ся зо словом до вірных, підкрисляючы важніст Воскресіня Христового в іх жытю, навязал до тогорічной річниці 100-літя наданя Автокефалиі Польскій Православній Церкви, зас о. Любомир Воргач подякувал вшыткым за присутніст на святі.

Дижуры Полномічника для меншын

Малопольскій Воєвідскій Уряд в Кракові інформує, што в каждый другій понедільок місяця, в год. од 15.00 до 17.00 в будинку Малопольского Воєвідского Уряду в Кракові при ул. Баштовій 22, будут одбывати ся дижуры для представників територияльного уряду та меншыновых орґанізаций, вчас котрых буде мож індивідуальні стрітити ся з Полномічным Малопольского Воєводы до справ Нацийональных і Етнічных Меншын. Дрібниці про дижуры мож найти на вебсайті Малопольского Воєвідского Уряду в Кракові.

Стріча грекокатолицкых єпископів – наслідників Віденьского Синоду з 1773 року

В днях 13. i 14. мая в Крижевцях в Хорвациі, на запрошыня крижевацкого єпархы – владыкы Міляна Стіпіча, одбыла ся друга стріча грекокатолицкых єпископів – наслідників Віденьского Синоду з 1773 року і Ужгородской Уніі. Стріча была результатом договору грекокатолицкых єпископів, котры зышли ся на святкуваню Віденьского Синоду минулого рока во Відни, коли было добесідуване, же єпископы будут ся стрічати раз на рік і дискутувати о вызначных душпастырскых темах Грекокатолицкой Церкви в середній і східній Европі. Стріча зачала ся в понедільок од вечырні в Грекокатолицкым Катедральным Соборі Пресвятой Тройці в Крижевцях. В віторок проґрам зачал архієрейском літургійом, по котрій наслідовали рефераты. Медже реферуючыма был і архієпископ і митрополита гайдудорожскій кыр Філіп Кочіш.

Дни Польковиц 2024

Ближат ся тогорічны Дни Польковиц. Свято міста одбуде ся 15. і 16. червця/юнія в Польковицкым Пікніковым Центрі. Проґрам буде зріжницюваный, серед чысленных концертів будут выступы м.ін. Орґанка, Пьотра Цуґовского, О.С.Т.Р. ци Славка Унятовского. Окрем концертів, Центр Культуры, орґанізатор, заплянувал шор товаришычых подій – розмаіты варштаты і атракциі для діти, для любителів спорту буде зрыхтувана стрефа кібіца – в тым часі репрезентация Польщы заграт меч з Нідерляндами в рамках Чампіонату Европы. Вступ на вшыткы концерты в рамках Днів Польковиц буде дармовый.

«Циркулярна міґрация. Достоменностьове міґруваня Лемків – текст і рытуал»

Катедра Росийского Літературознавства Інситуту Східньославяньской Філолоґіі Ягайлоньского Університету орґанізує заран, то єст в четвер 16. мая наукове зобраня, в рамках котрого проф. Олена Дуць-Файфер выголосит доподів пн. «Циркулярна міґрация. Достоменностьове міґруваня Лемків – текст і рытуал». Стріча одбуде ся в гыбридовій формі – мож буде взяти в ній участ на місци – в сали но 22 в будинку при ул. Інґардена 3, або через аплікацию Microsoft Teams – за тым мотузоком.