Сумар дня 15. квітня/апріля 2024 р.

Приносиме вам сумар медияльной ґрупы ЛЕМ.фм+ на ден 15. квітня/апріля 2024 р.

Перше засіданя СКУтНіЕМ по долшій перерві

В середу 17. квітня/апріля тр. в Варшаві одбуде ся 82. Засіданя Спільной Комісиі Уряду та Нацийональных і Етнічных Меншын, котрому проводити будут спілведучый комісиі з урядовой стороны Томаш Шыманьскій, Секретар Стану в МВСіА, та спілведучый комісиі з меншыновой стороны Григорий Куприянович. Буде то перше засіданя комісиі од понад девятьох місяців і перше од формуваня новых власти. В проґрамі засіданя єст м.ін. выменуваня новых членів комісиі, выступліня міністра дс. віроісповідань та нацийональных і етнічных меншын про заложыня політикы державы в однесіню до нацийональных і етнічных меншын та соспільности хоснуючой реґіональный язык. Поданы будут інформациі про дотациі на реализацию в 2024 р. задач, маючых на ціли охорону, захованя і розвиток культуровой достоменности нацийональных і етнічных меншын та захованя і розвиток реґіонального языка. Спільна Комісия затвердит гармоноґрам прац на текучый рік. Омовлены будут і результаты повселюдного спису з 2021 р. в однесіню до нацийонально-етнічной і языковой структуры польскых громадян.

«Облечыня Шляхтівскых Русинів»

Музей Сандецкой Землі просит на выставу посвячену облечыню Шляхтівскых Русинів. Шляхтівска Русь то найдале на заході положена русиньска енклява в Польщы, до складу якой входили штырі села: Шляхтова, Явіркы, Біла Вода і Чорна Вода. На выставі пн. «Облечыня Шляхтівскых Русинів» буде мож видіти, што облікали наштоден, а што од свята, і дознати ся, як сусідні ґрупы влияли на формуваня іх крою. Запрезентуваны будут м.ін. такы елементы облечыня як: чуга, опліча, холошні, ґачы, лайбик ци гунька. Kроі походят з колекциі Татряньского Музею в Закопаным зобраной перед ІІ світовом войном, Етноґрафічного Музею в Кракові, проватной колекциі Юрия Стариньского та Пєніньского Музею в Шляхтовій. Одкрытя выставы пройде в суботу 27. квітня/апріля о 15.00 год. в Пєніньскым Музею в Шляхтовій.

Дебата про меншынову політику по демократичным переломі

Кашебскій ЕтноТанк вєдно з Кашебскым Інститутом в Ґданьску просят на онляйнову дебату пн. «Меншынова політика по демократичным переломі. Вызваня – потребы – пріоритеты», в якій участ возмут проф. Ева Міхна з Ягайлоньского Університету, проф. Ґжеґож Януш з Універистету Мариі Склодовской-Кюрі в Люблині, проф. Славомір Лоджіньскій і проф. Лех Ніялковскій з Варшавского Університету, а ціліст буде модерувал проф. Цезарий Обрахт-Пронджыньскій з Ґданьского Університету, председа Кашебского Інституту. Стріча пройде в середу 24. квітня/апріля о год. 17.30 на плятформі ZOOM. Жебы взяти участ в стрічы – треба ся перше зареґіструвати через формуляр доступный на інтернетовым сайті ЕтноТанку.

Зміна орґанізациі руху в Польковицях

Ґміна Польковиці інформує о змінах орґанізациі руху на двох польковицкых улицях: Пшемысловій і Фабричній. Кєд іде о ул. Пшемыслову, од середы 17. квітня/апріля удоступненый для руху буде одтинок 3C, a од четверга заперты будут одтинкы нр 6 і 7, разом зо скрижуваньом з улицьом 3. Мая. То в рамках проґраму перебудовы доіздовых доріг до копален. А од пятниці 19. квітня/апріля од год. 9.00 до суботы до год. 12.00 закрыта для руху буде ул. Фабрична в рамках желізничного переізду. Причыном єст початок першого етапу модернізациі желізничных леній медже Любіном і Польковицями.

Джерело фотоґрафіі: фейсбуковый сайт Muzeum Ziemi Sądeckiej