Сумар дня 13. мая 2024 р.

Приносиме вам сумар медияльной ґрупы ЛЕМ.фм+ на ден 13. мая 2024 р.

Посвяченый пляц під будову правосланой церкви на святій Горі Явір

В віторок 7. мая, в третій ден Пасхы, на св. Горі Явір была служена пасхальна Літургія. Службу Божу очелювал владыка Паісий, архієпископ перемышльско-ґорлицкій, в асисті духовенства креницкого і ґорлицкого деканатів. По Літургіі был посвяченый пляц під будову православной церкви. Як бесідувал на закінчыня владыка Паісий – «(…) явірска святыня стала ся памятником столітя автокефалиі нашой церкви і 100. річниці явліня ся в тым святым місци Божой Матери. Буде она памятником віры нашых предків, тых, котры за православія оддавали жытя, были вывожены до Талергофу, Явожна, вышмарены з рідной землі в Акциі “Вісла” (…)». За словами владыкы в найблизшых днях рушат працы, жебы на свято апостолів Петра і Павла посвятити угольный камін і помістити го уж в фундаментах новой святыні.

Ревітализация мушыньскых курортів

Ґміна Мушына рыхтує ся до ревітализациі центрів Злоцкого і Жеґєстова. Працы будут реализуваны з середків направленых на курорты. Як подал бургомайстер Мушыны Ян Ґольба, то черговы інвестициі, завдякы якым ґміна має ся стати іщы барже атракцийном і притягнути туристів тіж на єй кіцні. Іде о будову променады вздолж Злоцкого, але і о камінну пляжу в Жеґєстові (тзв. Дептак над Попрадом), ци променаду через Жеґєстів-Село. Готова єст уж концепция ревітализациі тых теренів, котра неодолга буде представлена.

Перебудовуют послідній одтинк ул. Пшемысловой в Польковицях

Фурт тырват перебудова улиці Пшемысловой в Польковицях. Працы рушыли в вересни/септембрі минулого рока. Актуально тырват перебудова уж посліднього, 700-метрового одтинка дорогы, од Копальничых Закладів «Рудна Західня» до скрижуваня з воєвідском дорогом нр 333. На перебудовуваным одтинку будут дві біциґльовы стежкы: єдна рекреацийна, а друга выокремлена з дорогы і ідуча по долгости улиці. При нагоді перебудуваный буде 200-метровый одтинок ул. 3 мая, од візду на зовнішні басены до скрижуваня з Пшемысловом, при копальни «Рудна Західня». Вшыткы працы мают ся завершыти в марци будучого рока, але кєд поведе ся скоротити термін реализациі догваріня, дорога буде оддана до хоснуваня іщы в тым році.

«Гарасимович в Никыфора»

В минулу суботу в в Музею Никыфора в Креници одбыл ся вернісаж выставы пн. «Гарасимович в Никыфора». Выстава є символичном стрічом обох великых творців – поеты і маляря, котрых получыла любов до Бескідів, особливо до Лемковины. Презентує жытя і творчіст выдатного поеты та його захопліня Лемковином і штуком Епіфана Дровняка. Вернісаж зачал ся од прелекциі пн. «Лемковина в творчости Єжы Гарасимовича», яку выголосила Барбара Балуц. Єжы Гарасимович (1933-1999) вродил ся в Пулавах, родина по войні остаточно трафила до Кракова, де поета мешкал до кінця жытя. Емоцийонально найблизшы были му єднак горы, особливо Сандецкій Бескід, котрого красу высловлювал в вершах. Поета особисто знал Никыфора, посвятил малярьови пару вершів. Выстава є зрыхтувана во спілпрацы з Воєвідском Публичном Бібліотеком в Кракові. Буде єй мож обзерати в Музею Никыфора до кінця червця/юнія тр. Заплянуваны сут і товаришучы подіі. Більше дрібниц на нашым портали.

Джерело фотоґрафіі: orthodox.pl, о. Ярослав Ґрич, Давид Льорчык, Роберт Завидняк.