Сумар дня 12. квітня/апріля 2024 р.

Приносиме вам сумар медияльной ґрупы ЛЕМ.фм+ на ден 12. квітня/апріля 2024 р.

Черезграничны проєкты реновациі доріг на словацкым і польскым боці

Пряшівскый Самосправный Край (ПСК) зреализує дальшы вызначны проєкты на дорогах, завдякы черезгранічній спілпрацы Interreg. Новый асфальт буде лучыл пригранича Східніх Карпат, Вышній Шариш з Мушыном, як і пригранича через Дуклю. Реновациі буде піддана і дальша част в Пєніньскых Нацийональных Парках, конкретно в селі Камюнка. Реновация в сумі понад 10 км доріг в ПСК буде коштувала близко 7,2 млн евро. В рамках черезграничной спілпрацы Interreg Польща-Славация 2021-2027 будут зреализуваны дальшы штырі соспільны проєкты Справы і утримуваня доріг ПСК і польскых партнерів. Дорога буде ся робила приміром і в Малій Поляні або перед селом Ваґринец. Веце про черезграничны проєкты реновациі доріг прочытате в дописі на нашым портали.

О лемківскых медиях на конферецниі в Устриках Нижніх

В днях 9. і 10. квітня/апріля в Бєщадскым Центрі Культуровой Спадковины в Устриках Нижніх проходила медженародна конференция пн. «Спілпраца в обшыри функцийонуваня заникаючых культур в добі домінациі масовой культуры». В проґрамі конференциі не бракло доповіди на лемківскы/русиньскы темы. О лемківскых медиях, в тым очывидно о нашым радию, бесідувала ведуча Стоваришыня «Руска Бурса» в Ґорлицях – Наталия Малецка-Новак. З доповідю на тему «Обставины розвитку, реализациі прав русиньской меншыны і єй присутніст в Словацкій Республиі» выступил наш редакцийный камарат Петро Медвідь. В дальшых пунктах проґраму конференциі были доповід Петера Кудрача о ромскым стоваришыню з Гуменного, Маґды Контнік-Ковальской про сницарів з Жолыні, Роберта Банькоша о формуваню ся етносів на днешнім польско-украіньско-словацкым пограничы та Лукаша Байды істориі і дідовизні вельокултуровых Бєщадів.

Зелена і синя інфраструктура в Польковицях

В віторок 16. квітня/апріля пройде в Польковицях конференция, котра підсумує проєкт пн. «Зелена і синя інфраструктура в Польковицях». В рамках проєкту ґміна реализує девят інвестицийных задач, але і мягкы діяня тыкаючы едукациі, з будуваньом еколоґічной соспільности. Серед проєктів сут і такы звязаны з ревітализацийом зеленых обшыри. То м.ін. звекшене чысло дерев і кряків, роверовых стежок і стояків на біциґлі. Ґміна отримала на реализацию проєкту понад 6,4 млн злотых. Проєкт был реализуваный в партнерстві з фірмом з Осльо, котра являт ся лідером в хоснуваню добрых практик в обшыри зелено-синьой інфраструктуры в Норвеґіі. Цілю проєту было створіня зелено-синьой інфраструктуры на обшыри ґміны Польковиці, жебы звекшыти одпорніст міста на поступуючы зміны климату і ім протидіяти.

Варштаты в Рускій Бурсі в Ґорлицях

Припоминаме о заранішніх варштатах в Рускій Бурсі. Стоваришыня «Руска Бурса» в Ґорлицях просит діти і молодіж до участи в варштатах робліня квіточків з бібулы, такыx як давно (або недавно) робили нашы бабы. Пройдут они заран, 13. квітня/апріля о 12.00 год. в Рускій Бурсі. То чергова подія, котра проходит в рамках Творчой Бібліотекы – циклю стріч для діти і молодежы, вчас котрых рыхтуваны будут розмаіты ручной роботы артефакты. Вступне на варштаты дармо – забезпечаме тіж материялы. Сердечно просиме!