Сумар дня 12. квітня/апріля 2023 р.

Приносиме вам сумар медияльной ґрупы ЛЕМ.фм+ на ден 12. квітня/апріля 2023 р.

Лемків 12 700

Головный Статистичный Уряд опубликувал вступны результаты Нацийонального Повселюдного Спису веденого в Польщы в 2021 р. односячы ся до нацийонально-етнічной структуры і языка домашніх контактів. Приналежніст од одповідньой нацийональной або етнічной соспільности была окрисляна в рамках свобідной деклярациі. Подля вступных рахунків в Польщы лемківску нацийональніст подає 12,7 тис. осіб, з чого як першу: 8,6 тис., а як другу – 4,1 тис. осіб. Є то веце о близко 21% як в попереднім списі, коли лемківску нацийнональніст задеклярувало рівно 10 531 осіб. Вступны результаты не подают чысла осіб, што хоснуют лемківскій язык як тот хоснуваный дома. Шлезаків, якы не сут узнаны польскым правом нацийональном меншыном, є подля вступных рахунків близко 586 тис. На другым місци є кашебска меншына – близко 177 тис. осіб, а на третім німецка – 132,5 тис. осіб. Результаты списуваня населіня з 2021 рока вказуют, што польску нацийональну ідентифікацию задеклярувало 37 млн 149,5 тис. осіб, што становит 97,7% жытелів польской державы, непольску ідентифікацию задеклярувал 1 млн 339,6 тис. осіб, значыт 3,5%.

Будут ремонтувати мосты, тіж на Лемковині…

В пятницю 31. марця в Тисній підписали догваріня на ремонты мостів в рамках порозумліня медже Підкарпатскым Воєвідством а Державныма Лісами. Присутны были віцемаршалок Пьотр Пільх, директор Підкарпатского Заряду Воєвідскых Доріг Пьотр Міонсо, директор Реґіональной Дирекциі Державных Лісів Марек Марецкій. В рамках робіт будут вести інвестициі на дорогах номер 897 (што лучыт Тыляву з границьом державы на перегыбі Бескід на полудне од Волосатого) і номер 893 (што лучыт Гочев з Тисном), зроблят м.ін. міст в селах Мощанец ци Вiслок Великій. Інвестициі будут реализувати до листопада/новембра, іх кошт то близко 4 млн зл, з чого праві 3,5 млн зл походит з буджету підкарпатского воєвідства, а 0,5 млн зл то дофінансуваня Державных Лісів.

… і памятниковы церкви

Окрем результатів в рамках конкурсу «Народна культура і традиция», о котрых інформували сме вчера, Міністерство Культуры і Нацийональной Спадковины оголосило і результаты проґраму «Охорона памятників». Найвекшым бенефіциєнтом, кєд іде о лемківску спадковину, є католицка парохія з Брунар, якій признали 900 тис. зл на ІІІ етап консерваторско-будовляных робіт веденых при цекрви св. Михала Архангела – брунарска церков находит ся на Списку Світовой Спадковины Юнеско. Дальшы роботы ведены будут при церквах в Королику Волошскым, Білцаревій і Завадці Рыманівскій. В Королику докінчат ремонт даху та вымінят столярку, в Білцаревій вычыщат і заімпреґнуют ґонт, а в Завадці – так само выремонтуют і, де треба, вымінят, ґонт, а тіж замонтуют електричну інсталяцию, сиґнализацию пожару, одгромову та противламову. Окрем того дофінансуваня достала іщы православна парохія в Бортным, на консерваторскы роботы при іконах пророків, та католицка парохія в Щавным на роботы при зовнішній елевациі на церкви св. Димитрия.

Джаз і Лемкы

В будучым тыжни пройде стріча з лемківскыма джазовыма музиками – Мареком і Ґошом Тутко, в рамках циклю меджекультуровых стріч «Меншыны в діалоґу», орґанізуваных Документацийно-Выставенничым Центром Німців в Польщы. Запрошены гості оповідят м.ін. про тото, як видят своє місце і значыня в польскым соспільстві, поділят ся свойом музиком – лемківскым пісням Марек і Ґоша надают сучасный, джазовый аранж. Стріча одбуде ся в Ополи 21. квітня/апріля о 17.00 год.