Сумар дня 11. квітня/апріля 2024 р.

Приносиме вам сумар медияльной ґрупы ЛЕМ.фм+ на ден 11. квітня/апріля 2024 р.

Поможме «Ластівочці»

Припоминаме, што тырват збірка на сайті zrzutka.pl на Лемківскій Ансамбль Пісні і Танця «Ластівочка», якій діє при пшемківскым Кружку Стоваришыня Лемків. Причыном оголошыня збіркы є брак підпоры діяльности ансамблю Міністерством Внутрішніх Справ і Адміністрациі. Ластівочку творят не лем молодіж і дорослы, але тіж діти – ґрупа Ластівчата. Цілый колектив рахує близко 80 осіб. Ансамбль был основаный в 2001 р. В 2017 р. Ластівочка отримала цертифікат CIOFF. На ріжных фестівалях і концертах, в котрых брала дотепер участ, отримувала выріжніня. До шумного доробку мож додати іщы «бронзовый топорец» з 45. Медженародного Фестівалю Фольклору Гірскых Земель в Закопаным. Влони колектив был нагородженый престіжным Нагородом ім. Оскара Кольберґа. Грошы для Ластівочкы мож передавати через реченый сайт zrzutka.pl. На тот момент зобрано понад 5.300 зл.

Руска Бурса просит на варштаты

Припоминаме, што уж в тым тыжни Стоваришыня «Руска Бурса» в Ґорлицях просит діти і молодіж до участи в варштатах робліня квіточків з бібулы, такыx як давно (або недавно) робили нашы бабы. Пройдут они в тоту суботу, 13. квітня/апріля о 12.00 год. в Рускій Бурсі. То чергова подія, котра проходит в рамках Творчой Бібліотекы – циклю стріч для діти і молодежы, вчас котрых рыхтуваны будут розмаіты ручной роботы артефакты. На Квітну Неділю (за старым календарьом) запрашаме на малюваня писанок традицийном батіковом методом, а о дальшых будеме інформувати в своім часі, будут то м.ін. варштаты ляльок-мотанок ци рыхтуваня традицийных вінців на гробы з сушеного квітя. Інструкторком занять є Олена Дуць. Вступне на вшыткы варштаты дармо – забезпечаме тіж материялы. Сердечно просиме!

Польковицка бібліотека просит

62 тис. злотых дофінансуваня отримала Містецко-Ґмінна Публична Бібліотека в Польковицях в рамках проґраму Нацийонального Центра Культуры «Рідный – додай до улюбленых. Едиция 2024». В рамках той ініциятивы заплянувано вельо цікавых подій, то м.ін. лоґопедичны занятя для наймолодшых. Ученикы старышх кляс познают м.ін. жытя Чеслава Милоша, а старша молодіж – творчіст Ґомбровича. Проґрам дофінансувано з середків Міністра Культуры і Нацийональной Спадковины.

В Лютині вкажут знимкы з папом Франциском

Як інформувала Пряшівска Грекокатолицка Архієпархія, в стародавным поломницкым місци грекокатоликів на Словациі – в Лютини, буде одкрыта выстава фотоґрафій з приізду папы римского Франциска на Словацию. Выставу орґанізує місцева парохія вєдно з Обществом Християнсьскых Фотоґрафів Чоловік і Віра. Єй святочне одкрытя одбуде ся в неділю 14. квітня/апріля 2024 р. і буде єй мож видіти в просторах Ґалериі Мікулаша Климчака до 25. мая. В ден одкрытя выставы в лютиньскій базилиці кір Йона Максим, пряшівскій архієпископ і митрополита одслужыт архієрейску літургію, по котрій скінчіню буде участный і на вернісажы в ґалериі, яка стоіт в поломницкым ареалі коло базиликы.