Сумар дня 10. мая 2024 р.

Приносиме вам сумар медияльной ґрупы ЛЕМ.фм+ на ден 10. мая 2024 р.

Одкрытя Цмонтеря русиньскых особности

В неділю 12. мая в Чертіжным одбуде ся посвячыня і одкрытя зреконструуваного Цмонтеря русиньскых особности. Реконструкцию вєдно з селом реализувала Містна орґанізация Русиньской оброды на Словациі в Меджелабірцях і Грекокатолицка парохія Чертіжне. Святочна подія зачне ся літургійом, котру в Храмі Вознесенія Господа одслужыт Высокопреосвященый Йона, пряшівскій архієпископ і митрополита. Проґрам буде дальше продолжал на цмонтери, де сут похованы такы особности русиньской істориі як Адольф Добряньскій ци Юлий Ставровскій-Попрадов. На гробі Адольфа Добряньского буде одслужена і панахіда. Реконструкцию Цмонтеря русиньскых особности Чертіжне підпорило Міністерство інвестиций, реґіонального розвитку і інформатизациі Словацкой Республикы.

Проф. Ян Пісуліньскій о постанові ІНП – выклад в Рускій Бурсі 

В пятницю 24. мая в Рускій Бурсі в Ґорлицях выклад пн. «Постанова о ремісиі слідства в справі акциі ”Вісла” – чом не мож згодити ся з єй змістом?» выголосит др габ. Ян Пісуліньскій, професор Ряшівского Універистету, автор моноґрафіі «Акция специяльна ”Вісла”». Выклад буде выголошеный в польскым языку. Початок о 18.00 год. Припомнийме, што піл рока тому Інститут Нацийональной Памяти (Instytut Pamięci Narodowej) ствердил, што, парафразуючы – не было ничым злым, же Лемкы і Украінці досвідчыли акциі «Вісла». Не было і не є згоды на такы стверджыня. Неє згоды на фальшуваня істориі. Професор Ян Пісуліньскій пояснит чом. Більше дрібниц чытайте на нашым портали.

Документальный фільм про Лемків «Они то мы»

Центр Туристичного і Культурового Продукту Ґорлицкого Бескіду просит до участи в подіі, котра має припомнути 77. річницю траґічной акциі «Вісла». Для упамятніня тых подій просят на показ короткометражного документального фільму пн. «Они то мы», котрый оповідат о лемківскій меншыні, єй доли в часі выселіня по другій світовой войні і повороті до отчызны. Репортаж был зрыхтуваный в формі інтервю з особами звязаныма з соспільністю, а іх выповіди ведут наррацию цілого фільму. Дополніньом звуку єст образ відео – кадры вказуючы Низкій Бескід, в тым находячій ся на його обшыри Маґурскій Нацийональный Парк, та жытелів тых теренів і іх штоденны занятя. Репортаж занял перше місце на 21. Медженародным Фестівали Непрофесийональных Фільмів «Кохати чловека» в катеґориі документ. Його авторком єст Мартина Фудаля, Ґорличанка, студентка катовицкой Фільмовой Школы. Показ фільму буде попередженый прелекцийом Адама Сулімского пн. «Коротка істория Лемковины». Подія пройде заран, в суботу 11. мая о 17.00 год. в Ґалериі Стара Реміза в Высовій. Вступне дармо.

Зміна орґанізациі руху в Польковицях

Ґміна Польковиці інформує о утруднінях в руху – іде о ремонт желізничного переізду на улици Фабричній. Як інформує зараджаючый желізничном ленійом, PMT Желізничны Леніі, ремонтовы працы зачнут ся в ранішніх годинах в віторок 14. мая. На час робіт желізничный переізд буде цілковито запертый і введена буде тымчасова зміна орґанізациі руху. Обізд вызначеный є улицями Хоцяновском і воєвідском дорогом нр 331. Утрудніня мают потырвати до 20. мая. Направа переходу єст конечна і выкликана дальшым етапом ленійовых робіт в рамках реализуваной задачы модернізациі желізничных леній 971 і 971а медже Любіном і Польковицями.